Imia Vitala Ziałkoŭskaha viedajuć niamnohija. Ale ŭ tvar jaho paznaje značna bolšaja kolkaść ludziej. Vital — toj samy «suvory turyst» ź Biełarusi, jaki nabyŭ viadomaść praź bieźlič sełfi ź niepranikalnym vyrazam tvaru.
Niadaŭna Vital abviaściŭ, što źbirajecca bałatavacca ŭ prezidenty Biełarusi. Zapeŭnivaje, što heta nie žart.
Voś taki kałaž vykłaŭ u svaje sacsietki Ziałkoŭski
Ziałkoŭski maje try vyšejšyja adukacyi, šmat padarožničaje, viedaje niekalki zamiežnych moŭ. Naprykład, na pytańni «Našaj Nivy» jon adkazvaŭ, znachodziačysia ŭ Niderłandach. Vital upeŭnieny, što zmoža vykarystać svoj dośvied i svaje viedy ŭ palityčnym žyćci.
«Maja meta heta mahčymaść prymianiać svaje viedy na vysokim uzroŭni. Ja baču składanaści ŭ roznych śfierach Biełarusi. Toje, jak vyrašajucca hetyja prablemy, pryvodzić da dumki, što kiraŭnictva Biełarusi nie vałodaje viedami pra sučasnyja i standartnyja sposaby vyrašeńnia takich pytańniaŭ. A časam składvajecca ŭražańnie, što robicca naŭmysnaje paharšeńnie zakanadaŭstva: heta vidać na prykładzie admien sacyjalnych ilhot, paharšeńnia miedpasłuh, adsutnaści miedstrachavańnia, fiktyŭnaj baraćby z karupcyjaj, adsutnaści ličbavaha ŭrada, najaŭnaści adstałych vybarčych technałohij. Heta ŭsio nieabchodna mianiać. Siońniašni ŭrad choča daciahnuć da piensii biez hłabalnych pieramienaŭ, ale z hetymi pytańniami daviadziecca pracavać», — raspavioŭ Ziałkoŭski «Našaj Nivie».
Jon kaža, što dziejničać płanuje nie ad Libierał-demakratyčnaj partyi Biełarusi, choć i źjaŭlajecca jaje siabram užo niekalki hadoŭ.
«Z ŁDPB ja ŭ dobrych adnosinach, my možam i dalej supracoŭničać, ale ŭ mianie bolš vysokija ambicyi, i ja pavinien budavać płany samastojna, — tłumačyć Ziałkoŭski. — Ja vyrašyŭ pasłuchać parady svaich upłyvovych siabroŭ i vyłučyć svaju kandydaturu».
Praŭda, što za ŭpłyvovyja siabry paŭpłyvali na jaho, Vital nie ŭdakładniŭ.
Toje, što jaho viedajuć u pieršuju čarhu jak miem, Ziałkoŭskaha zusim nie pałochaje:
«Samaje hałoŭnaje, što ja ŭžo viadomy. Heta ŭžo niejki vopyt, pijar-technałohii možna taksama vykarystoŭvać dla stvareńnia imidžu».
Na pytańnie, ci simpatyčny jamu chtości ź siońniašnich palityčnych dziejačaŭ ci čynoŭnikaŭ, Ziałkoŭski adkazvaje, što nie vielmi.
«Sprava ŭ tym, što ŭsie čynoŭniki — heta siabry dziejučaha prezidenta. Ja chacieŭ by, kab było bolš šancaŭ dla realizacyi nie tolki jak praz Administracyju prezidenta Biełarusi, ale i inšymi lehalnymi sposabami. Chutka pryjduć pieramieny, i nieabchodnyja buduć novyja ludzi nie tolki z vopytam sielskaj haspadarki, ale i pramysłovym, i mižnarodnym. Mianie naprykład cikaviać bolš temy sučasnych technałohij i aŭtamatyzacyi na telebačańni, a baču tolki fota karoŭ i raznosy rabotnikaŭ. Mianie heta nie zadavalniaje, ja chaču bačyć u Biełarusi toje, što mnie padabajecca bačyć u Jeŭrasajuzie», — kaža jon.
Ziałkoŭski ličyć, što moža pieramahčy: «Ja ŭsurjoz raźličvaju na pieramohu, u mianie dla hetaha jość usie mahčymaści».
Darečy, budučy prezident musić pražyvać u Biełarusi nie mienš za 10 hadoŭ pierad vybarami. Vital, jaki časta znachodzicca za miažoj, upeŭnieny, što adpaviadaje patrabavańniam. «Ja pražyvaŭ u Biełarusi zaŭsiody. Paśla instytuta mianie raźmierkavali na «Biełvar», ja prapracavaŭ tam 3 miesiacy, potym na instrumientalnym zavodzie majstram, a potym užo pačalisia karotkija kamandziroŭki», — raskazaŭ jon partału Tut.by.
Zatoje, kali Ziałkoŭski praź niejki nievierahodny źbieh abstavinaŭ raptam pieramoža, u biełarusaŭ źjavicca simpatyčnaja pieršaja ledzi — «suvory turyst» ažaniŭsia ŭ minułym hodzie.
