Na katalickich mohiłkach Bieraścia zachavałasia mahiła ŭdzielnikaŭ paŭstańnia 1863-1864 hadoŭ, piša Radyjo Racyja.
Na mietaličnym kryžy adnaho z nadmahillaŭ, jakoje vypadkova vyjaviŭ i pradstaviŭ šyrokamu kołu hramadstva krajaznaŭca Ivan Čajčyc, jość uzhadka pra paŭstańnie.
«U Polščy ŭ 1921 hodzie pracavała francuzskaja vajennaja misija, jakaja zajmałasia pošukam pachavańniaŭ francuzaŭ. Pryčym šukali mahiły nie tolki vajennych, ale i cyvilnych asobaŭ. I voś z takoj dumkaj, što niešta zachoŭvajecca na mohiłkach, ja nakiravaŭsia. Francuzaŭ ja nie znajšoŭ. Ale kali ja znajšoŭ kryž, na jakim na tabličcy napisana «paŭstancam», ja prysieŭ ad ździŭleńnia», — kaža Ivan Čajčyc.
Nadpis na kryžovaj šyldzie polskamoŭny i hučyć jak: «Irena i Franciszek Kornelukowie powstańcy — 1863.r ich syn — Jan i Józefa Kornelukowie». Pakul niama infarmacyi pra toje, kim byli hetyja ludzi padčas paŭstańnia, albo ŭ cyvilnym žyćci.
«Adnak niahledziačy na heta, pomnik usio roŭna ŭnikalny i voś čamu, — kaža Ivan Čajčyc, — Heta adzinaje pachavańnie paŭstancam, viadomaje na siońniašni čas, na terytoryi horada Bieraście. I heta kruta».
Ivan Čajčyc schilajecca da viersii, što šylda z nadpisam na hetym kryžy źjaviłasia ŭ pačatku XX stahodździa, choć pramoha dakumientalnaha paćvierdžańnia hetamu niama. Ušanavać pamiać, albo naviedać nadmahille paŭstancaŭ Iryny i Franciška Karnialukoŭ možna na katalickich mohiłkach XIX st, što ŭ Bieraści, jakija raźmieščany na vulicy Puškinskaj.
