Jak paviedamlaje presavaja słužba «Maładoha frontu», siońnia ŭ hałoŭnym vajskovym špitali Ministerstva abarony Biełarusi siabru arhanizacyi, niadaŭna zabranamu ŭ vojska Źmitru Chviedaruku była zroblenaja aperacyja na vienie.
Pa słovach Źmitra Chviedaruka, paśla aperacyi jon adčuvaje siabie dobra.
Raniej padčas medyčnaha abśledavańnia ŭ vojsku vyśvietliłasia, što Chviedaruk chvory na varykoznaje pašyreńnie vienaŭ i jamu patrebnaja aperacyja. Śpiarša planavałasia, što praź niedachop miescaŭ u špitali aperacyju zrobiać tolki 14 krasavika, adnak potym lekary źmianili rašeńnie.
Nahadajem, Źmitra Chviedaruka 28 studzienia zatrymali doma i advieźli ŭ vajenkamat. Źmicier vučyŭsia ŭ bahasłoŭskim kaledžy na dzionnym adździaleńni. Vajskoŭcy paviedamili, što kaledž na ciapierašni momant nia maje licenzii, i tamu jany ličać, što ŭ Źmitra niama ŭvažnaj pryčyny dla adterminoŭki ad słužby. Im nie pieraškodziła j toje, što Źmitra sudzili ŭ 2006 hodzie za ŭdzieł u niezarehistravanaj arhanizacyi.
Chłopca advieźli spačatku ŭ milicyju, a potym u turmu — adbyvać 10 sutak za ŭdzieł u letašniaj akcyi 1 traŭnia. 29 studzienia jaho pryvieźli z turmy ŭ palikliniku, dzie jon admoviŭsia prachodzić abśledavańnie. Niahledziačy na heta, medyki dali zaklučeńnie, što jon prydatny dla vajskovaj słužby.
