Hrupa apazicyjnych palitykaŭ u składzie staršyni Partyi BNF Lavona Barščeŭskaha, byłych palitviaźniaŭ Alaksandra Kazulina i Michaiła Maryniča, kiraŭnika BSDH Stanisłava Šuškieviča i kaardynatara «Chartyi‑97» Andreja Sańnikava ŭ aŭtorak zrabiła zajavu, što nie ličać mahčymym dałučeńnie Biełarusi da prahramy «Uschodniaha partniorstva», pakul nie buduć vykananyja raniejšyja patrabavańni ES.
«U sutnaści my padtrymlivajem uvachodžańnie Biełarusi ŭ prahramu «Ŭschodniaha partniorstva». Adnak siońniašni fon i čas nieprymalny dla takich inicyjatyvaŭ. U krainie źjavilisia novyja palitviaźni, adbyŭsia brutalny razhon akcyi na Dzień śviatoha Valancina», — skazaŭ Ł.Barščeŭski.
Stanisłaŭ Šuškievič zaznačyŭ, što ŭ Jeŭropie zabylisia na 12 umovaŭ, jakija biełaruskija ŭłady pavinny vykanać dla narmalizacyi stasunkaŭ ź ES. «Čamu Sałana kaža, što nijakich umovaŭ niama? Ja chaču nahadać jeŭrapiejskim palitykam kolišniaje vykazvańnie Vacłava Havieła, što palityka — heta mastactva niemahčymaha», — zaznačyŭ były staršynia Viarchoŭnaha savietu.
«My papiaredžvali našych siabroŭ u Rasii, što mahčymaja łukašenizacyja ichnaj krainy. Tak i adbyłosia. Ciapier my zaniepakojenyja, kab nie adbyłosia łukašenizacyi Jeŭropy. My papiaredžvajem Jeŭropu ŭ niebiaśpiečnaści takich hulniaŭ z Łukašenkam», — skazaŭ Andrej Sańnikaŭ.
Michaił Marynič adznačyŭ, što nie moža spakojna stavicca da vizitu ŭ Minsk Chaŭjera Sałany. «U krainie praciahvaje kvitnieć biezzakońnie, zapałochvańnie, karupcyja, represii. Heta pamyłka z boku Jeŭropy — zaihryvańnie ź biełaruskimi ŭładami», — adznačyŭ M.Marynič.
Taksama Lavon Barščeŭski adznačyŭ źbieh ličbaŭ, što 7 maja, kali Łukašenku mohuć zaprasić na samit u Prahu, spoŭnicca roŭna 10 hadoŭ z dnia źniknieńnia Juryja Zacharanki.
