Departamient kantrolu jakaści viedaŭ nie praciahnuŭ akredytacyju Minskamu inavacyjnamu ŭniviersitetu, situacyja stała palityčnaj, studenty vyjšli na zabastoŭku! Tak pačaŭsia hety tydzień.
Rektar Mikałaj Suša daŭ emacyjnaje intervju «Biełaruskamu partyzanu», u jakim uskłaŭ adkaznaść za prablemy z akredytacyjaj univiersiteta piersanalna na ministra adukacyi Ihara Karpienku: maŭlaŭ, pretenzii — nadumanyja i abstraktnyja, sapraŭdnaja pryčyna — asabistaja niepryjaź Karpienki, a pry sprobie źviazacca ź ministram — cišynia.
«Naša Niva» patelefanavała Iharu Karpienku, kab spytać, što ž u jaho tam za kanflikt z Sušam i čamu, kali tak, Karpienka jaho ihnaruje.
«Chto da kaho nie moža dazvanicca? Nu vy ž dazvanilisia? Ja numar nie mianiaŭ! Niechta nie moža trapić na pryjom? Voś siońnia ŭ mianie byŭ Siarhiej Ramaniuk [rektar pryvatnaha Biełaruskaha instytuta pradprymalnictva — «NN»], a Suša ŭ mianie nie byŭ! Pry kancy kastryčnika ŭ Baranavičach prachodziŭ sieminar dla rektaraŭ, ja tam byŭ dva dni, i Suša taksama byŭ, ale da mianie navat nie padychodziŭ!»,
— skazaŭ Karpienka i z nastupnymi pytańniami adrasavaŭ da inšych rabotnikaŭ svajho viedamstva.
Karespandent «Našaj Nivy» pryjechaŭ u Minadukacyi, kab razabracca, dyk što adbyvajecca z tym niaščasnym MIU.
Pahavaryŭ z nami Siarhiej Kaśpiarovič — načalnik hałoŭnaha ŭpraŭleńnia prafiesijnaj adukacyi.
Siarhiej Kaśpiarovič.
U svaim intervju Mikałaj Suša nazyvaje siarod pryčyn spynieńnia akredytacyi propuski słovaŭ u žurnale, niedachop litaratury ŭ biblijatecy, niepadpisany płan zaniatkaŭ.
Ale ŭ ministerstvie nazyvajuć zusim inšuju pryčynu, a niedachop tych knih ličać zaŭvahaj, nie vartaj abmierkavańnia: «Zrazumieła, što takaja zaŭvaha vyrašajecca za hadzinu — treba ŭsiaho tolki dakupić nieabchodnaje i pryvieźci ŭ biblijateku».
Pavodle Kaśpiaroviča, asnoŭnaja pryčyna prablem u MIU — dziŭnaja arhanizacyja dystancyjnaj formy navučańnia. Situacyja skłałasia paradaksalnaja: na asobnych śpiecyjalnaściach, naprykład, na «psichałohii», dzionna nie vučycca nivodzin čałaviek! Dystancyjna — 74.
Na «pravaznaŭstvie» — 191 dystancyjny student, na dzionnym 280;
Na «Transpartnaj łahistycy» — 62 dystancyjna, 114 — dzionna;
Na «Ekanomicy i kiravańni pradpryjemstvami» — 119 dystancyjna i tolki 8 na dzionnym!
U Departamienta kantrolu jakaści adukacyi paŭstała pytańnie mienavita da taho, a jak vučacca ŭsie hetyja ludzi, jakija nie chodziać va ŭniviersitet?
«Kamisija praviała kantrolnuju atestacyju viedaŭ studentaŭ dzionnaj formy navučańnia — jaje sens u tym, kab pravieści, hruba kažučy, test pa prahramie ŭniviersiteta, nie dać mahčymaści studentam śpisać i zaśviedčyć, pa-pieršaje, ci supadajuć realna ich viedy z aficyjnaj akademičnaj paśpiachovaściu, a pa-druhoje, kali acenki masava niezadavalniajučyja, to tady pytańnie da jakaści adukacyi.
Sa studentami dzionnaj formy, jak i kaža rektar, nijakich prablem nie było — acenki dobryja. Ale, jak my bačym, na niekatorych śpiecyjalnaściach na dzionnym vučycca litaralna paru čałaviek, a ahulnaja kolkaść studentaŭ dystancyjnaj formy navučańnia dachodzić da 80%.
A ŭ nas niama takoha paniaćcia, jak asobny kantrol form navučańnia — praviarajecca ŭsia śpiecyjalnaść. I kamisija nie zdoleła pravieści kantrolnuju atestacyju viedaŭ studentaŭ-dystancyjščykaŭ! Rektar listom paviedamiŭ kamisii, što arhanizavać zbor studentaŭ dla kantrolnaj atestacyi niemahčyma!
Jak nam tady pravieści atestacyju? Bolš za toje, pry akredytacyi MIU kamisija nie znajšła adkazaŭ na pytańni, a jak arhanizavany vučebny praces u hetych studentaŭ — nie pradstaŭlena navat raskładu zaniatkaŭ. Niezrazumieła, jak adbyvajucca kantrolnyja i biahučyja atestacyi (praktyčnyja, testavyja i samastojnyja raboty — «NN»)», — skazaŭ nam Kaśpiarovič.
U realnaści kantrol viedaŭ hetych studentaŭ adbyvajecca tak: čałaviek prachodzić testy na kampjutary, uvachodziačy ŭ svoj akaŭnt na sajcie ŭniviersiteta.
Jak takoje stała mahčymym? Jašče ŭ 2014 hodzie tahačasny ministr adukacyi Siarhiej Maskievič daŭ MIU prava kantralavać viedy studentaŭ jašče i anłajn, bolš nichto ŭ krainie tak nie robić. Voś vytrymka z hetaha dakumienta:
Karpienka hetaje pałažeńnie admianiŭ, bo ličyć, što jano supiarečyć Kodeksu ab adukacyi.
Dyk a jak prakantralavać tady, chto i jak zdaje hetyja testy?
«Našaj Nivie» nie skłała ciažkaści znajści adpaviednyja pasłuhi ŭ internecie i pierakanacca, što mahčymaść nie zdavać testy samastojna jość — dla hetaha, jak akazałasia, isnuje sajt, zatočany tolki pad MIU! Cana ad 35 da 250 rubloŭ.
Firma absalutna nie šyfrujecca i ŭkazvaje svoj adras i biełaruskija kantakty. Sajt, pavodle veb-kešu, u takim vyhladzie isnuje z 2011 hoda.
Uźnikaje nastupnaje pytańnie — čamu ministerstva tolki ciapier zapadozryła ŭ dystancyjnaj adukacyi prafanacyju?
«Tut treba razumieć, što ŭniviersitet nie infarmuje nas ab usim, što ŭ jaho adbyvajecca. Ciapierašni štat ministerstva daviedaŭsia ab hetaj schiemie tady, kali my pačali vyvučać situacyju z navučańniem źniavolenych u kałonijach. Jak heta było arhanizavana? Ładna, kali čałaviek traplaje ŭ kałoniju, byŭšy studentam — jon moža ŭ niejkaj formie adnavicca. Ale na praktycy było tak: ludzi nibyta pastupali ŭ rasijski ŭniviersitet (ich było dva), a paśla pieršaha kursa «pieravodzilisia» ŭ MIU. Heta było zroblena, kab abyści patrabavańnie ab zdačy CT.
Vučoba taksama adbyvałasia vielmi dziŭna, vyklučna ŭ dystancyjnym farmacie. Našaja kamisija pryjšła da vysnovy, što sami vykładčyki pryjazdžajuć tolki na kantrolnuju atestacyju, na dziaržaŭny ekzamien, značycca. I ŭsio! Uźnikła vialikaje pytańnie da jakaści hetych viedaŭ. Tady my praviali niekalki naradaŭ z Departamientam vykanańnia pakarańniaŭ, pryjšli da vysnovy, što vučyć takich ludziej treba, ale davajcie rabić heta niejak zakonna?
I tady byli listy ministra Karpienki da Sušy, u jakich davodziłasia, što ŭ takoj formie adukacyja źniavolenych isnavać nie moža, ale pry ŭmovie daviadzieńnia schiemy da ładu, arhanizacyi vyjezdaŭ vykładčykaŭ dla pryniaćcia ekzamienaŭ na miesca — nijakich prablem! Ale tady my i zacikavilisia, jak heta adbyvajecca nie ŭ kałonijach, a ŭ samim univiersitecie», — dadaŭ Kaśpiarovič.
Ale, jak viadoma, paśla hetych zaŭvah tema adukacyi źniavolenych praciahu nie mieła — moža być, nie vielmi vyhadna ahranizoŭvać častyja vyjezdy vykładčykaŭ u 8 kałonij?
Ciapier ža ŭ ministerstvie bačać dva vyjści ź situacyi — abo MIU asprečyć rašeńnie kamisii i dakaža, što ŭsio ź viedami studentaŭ-dystancyjščykaŭ jak maje być, abo vypravić parušeńni i niešta źmianić u svajoj dziejnaści, bo praciahvać takuju adukacyju paśla skasavańnia pryvileja ad Maskieviča ŭžo nielha.
Jak być studentam dzionnaj formy navučańnia?
Kaśpiarovič patłumačyŭ, što pry ŭmovie, kali situacyju raźviazać nie ŭdasca, studentam vypusknych kursaŭ budzie prapanavana davučycca ŭ inšych univiersitetach pa prahramach MIU biez zdačy akademičnaj roźnicy.
A dla tych, maŭlaŭ, chto nie na vypusknym kursie, budzie praduhledžana mahčymaść pieravieścisia ŭ inšy ŭniviersitet z zachavańniem toj hadavoj apłaty, na jakuju jany zaklučyli ŭhodu ź MIU. Košt navučańnia tam na dzionnym — kala 2560 rubloŭ u hod, na dystancyjnym — kala 1200 rubloŭ.
