Stužka hranična ščyraja. Dzieja ŭ joj raspačynajecca 31 śniežnia 1999 hoda sa scenaŭ u siamji režysiora, jakaja rychtujecca da navahodniaha viečara. Vystupleńnie Barysa Jelcyna i jahonaja zajava pra adstaŭku stanovicca ŭzrušeńniem dla siamji Manski, piša Aleh Dziarnovič na gazeta.arche.by.
U štabie Uładzimira Pucina paśla ahučvańnia pieršych vynikaŭ prezidenckich vybaraŭ 26 sakavika 2000 h. Za śpinaj Pucina — Dźmitry Miadźviedzieŭ. Kadr ź filma «Śviedki Pucina».
Ale kamiera režysiora nastojliva załazić u patajemnyja kutki pryvatnaha žyćcia.
Adna ź niepryjemnych scen u pačatku stužki, jak Manski sprabuje praleźci z kinakamieraj u vanny pakoj, a jahonaja 12-hadovaja aholenaja dačka supraciŭlajecca baćkoŭskaj nastojlivaści. Takim ža hranična aholenym režysior sprabuje być na praciahu ŭsiaho filma. I miescy dla hetaha abranyja znakavyja — dom Jelcyna i vybarčy štab Pucina ŭviečary 26 sakavika 2000 h., u dzień vybaraŭ prezidenta Rasijskaj Fiederacyi.
I tut nam narešcie prychodzić razumieńnie, adkul u režysiora takija ekskluziŭnyja kadry.
Na praciahu 2000 hodu Manski zdymaŭ film, jaki musiŭ byŭ spryjać lehitymacyi novaha režymu. Stužka mieła krasamoŭnuju nazvu: «Rasija — pačatak». Tamu režysior mieŭ dostup i da siamji Jelcyna, i da kamandy Pucina.
Pieramohu Pucina śviatkujuć u siamji Jelcyna. Źleva naprava: Naina Jelcyna, Taćciana Dźjačenka (dačka Jelcyna), Barys Jelcyn, Michaił Lesin. Kadr ź filmu «Śviedki Pucina».
U atačeńni Jelcyna zmahalisia dva palityčnyja błoki — «siłaviki» i «demakraty». Prajekt «Pucin» byŭ zhienieravany jakraz «demakratyčnym kryłom» jelcynskaha atačeńnia i jahonaj «Siamjoj». Mienavita tamu my bačym u kadry tak šmat znajomych jašče z poźniaj Pierabudovy ci pieršych hadoŭ jelcynskaj Rasii piersanažaŭ — Anatol Čubajs, Michaił Kaśjanaŭ, Hleb Paŭłoŭski, kiraŭnictva NTV… Pamiž siadzibaj štaba Pucina i domam Jelcyna kursiruje ministr infarmacyi i ŭładalnik miedyjaresursaŭ Michaił Lesin. 5 listapadu 2015 h. u vašynhtonskim hateli «The Dupont Circle» miljanier i były rasijski ministr budzie znojdzieny niežyvym, pavodle pratakołu palicyi, z «tupymi siłavymi traŭmami hałavy».
Za čas pieršaha prezidenctva ad vybarčaj kamandy 2000 hodu pry Pucinie zastaŭsia tolki Dźmitry Miadźviedzieŭ, tahačasny kiraŭnik vybarčaha štabu. Usie astatnija ŭ svajoj absalutnaj bolšaści zahinuli, emihravali, syšli ŭ apazicyju.
Režysior Vital Manski robić intervju z Uładzimiram Pucinym. Kadr ź filma «Śviedki Pucina».
Niekatoryja padziei ŭ filmie tolki paznačany i im dadziena karotkaja acenka. Jak, naprykład, prablema sieryi padryvu žyłych damoŭ 4—16 vieraśnia 1999 h. u Bujnaksku, Maskvie i Vałhadonsku. U vyniku tych padziej u rasijskim hramadstvie ŭźnikła patreba ŭ «ćviordaj ruce», vulicy haradoŭ zapoŭnili vajennyja, a rejtynh premjer-ministra Pucina padskočyŭ z 2 % da 50 %.
Vital Manski prysutničaŭ i vystupaŭ na pakazie ŭ Minsku 2 listapada.
Paśla demanstracyi filma aŭtar stužki ahučyŭ svaju pazicyju: jon nie dumaje, što hetyja terarystyčnyja akty byli admysłova arhanizavany FSB. Chutčej za ŭsio, śpiecsłužby išli pa śledu realnych paŭnočnakaŭkazskich bajevikoŭ. U takim razie, zastajucca pytańni, jak terarystaŭ «viali» i čamu im nie pieraškodzili.
U psichałahičnym płanie, dakumientalny film «Śviedki Pucina», badaj što, najbolš zmročny, z pradstaŭlenych na sioletnim «Listapadzie». A na pytańni z zały, što nas jašče čakaje, Manski adkazaŭ: «Usio, što budzie, užo adbyłosia». I spasłaŭsia na svoj ułasny dośvied — u Łatvii, dzie jon ciapier žyvie, na apošnich prezidenckich vybarach prezidenta Rasii rasijskija hramadzianie addali Pucinu svaich 98,8 % hałasoŭ. U hetym sensie, ličyć režysior, emihravać niama kudy.
U samym kancy Manski pryznaŭsia: pakazy jahonaj karciny adbylisia ŭ 56 krainach, ad Mieksiki da Tajvania, i nidzie pry finišnych scenach filma nie było takoj trahična maŭklivaj zali, jak u Biełarusi. Manski paabiacaŭ asensavać hety fienomien.
