Francuski aktor Žerar Depardźjo pałka prysiahaŭ u lubovi da Biełarusi i jaje kiraŭnika, ale nie śpiašajecca puskać karani na vydzielenych jamu 15 sotkach na Mienskim mory, piša radyjo «Svaboda».
Vioska Łaparavičy ŭ Papiarnianskim sielsaviecie Mienskaha rajonu ź niadaŭniaha času stała adnym z ulubionych prytułkaŭ zamožnych ludziej sa stalicy: ich pryciahvaje blizkaść da Miensku i pry hetym adnosnaja izalavanaść ad lišnich vačej.
Nia tak daŭno tut stała na adnaho zornaha žychara bolej — pakul tolki na papiery. Adrazu na stahodździe atrymaŭ u arendu ŭčastak pad zabudovu francuski aktor Žerar Depardźjo. Płata za «braniravańnie» symbaličnaja — dzieści 5 eŭra na miesiac. Ale ŭ hetym i padvoch: žyć u takoj nieruchomaści možna, a voś pradać jaje nie atrymajecca. Chiba tolki ŭ paradku vyklučeńnia i z dazvołu kiraŭnika krainy.
Zorny pierasialeniec
Niekali adzin z samych jaskravych aktoraŭ usiaśvietnaha kinematohrafu, a ciapier apantany vinarob i epatažny vandroŭnik za apošni čas dvojčy naviedvaŭsia ŭ Biełaruś.
U svoj pieršy pryjezd letam 2015-ha Depardźjo paznajomiŭsia z Alaksandram Łukašenkam: haściavaŭ u prezydenckaj rezydencyi «Aziorny» ŭ Astrašyckim haradku, razam jany kasili travu dy abmiarkoŭvali prablemy sielskaj haspadarki. Natchniŭšysia tutejšymi krajavidami, francuz rytaryčna pramoviŭ: «Jak dobra było b pažyć siarod miascovych sialanaŭ!»
Pažadańnie vysokaha hościa ŭspryniali litaralna: asabistym rasparadžeńniem «dobraha prezydenta», jak acharaktaryzavaŭ Łukašenku francuski aktor, novamu siabru vydzielili 15 sotak pad dom. Kali administracyjnyja pracedury pa afarmleńni byli zavieršanyja, praz dva hady Depardźjo znoŭ naviedaŭ Biełaruś, kab asabista prainspektavać učastak.
Nadzieł ad Papiarnianskaha sielsavietu vydzielili ekskluziŭny — u vioscy Łaparavičy, pry samaj vadzie ŭ achoŭnaj zonie Mienskaha mora. Kali pahladzieć źvierchu, heta dobra ŭmacavanaja paŭvyspa, dostup da jakoj z boku vioski abmiežavany štučnym kanałam.
Na pieršaj linii ŭžo atabarylisia viadomyja asoby, pieravažna spartoŭcy. Bijatlanisty — Darja Domračava, jaje kaleha pa zbornaj Siarhiej Novikaŭ, ich nastaŭnik Andryjan Cybulski. Futboł pradstaŭlajuć viadomy trener Viktar Hančarenka, eks-forvard BATE Vital Radzivonaŭ, veteran hulni № 1 Alaksandar Hleb dy inšyja. Niezdarma vulicu nazvali Spartyŭnaj.
Łaparavickaja ziamla imkliva raście ŭ canie, rynkavy košt učastku, analahičnaha depardźjoŭskamu, ryełtary aceńvajuć u 200—300 tysiač dalaraŭ. Daražejšaja chiba tolki ziamla ŭ Drazdach, dzie na lhotnyja kredyty pabudavalisia čynoŭniki najvyšejšaha ranhu, dy jašče za Nacyjanalnaj biblijatekaj.
Depardźjo rynkavyja vahańni nia tyčacca. Damova arendy padpisanaja na 99 hadoŭ, hadavy ŭniosak — krychu bolš za 50 eŭra ŭ ekvivalencie. Ździełka zaśviedčanaja ŭ rehistry koštu ziamli i ziamielnych nadziełaŭ Nacyjanalnaha kadastravaha ahienctva. Kali zychodzić sa schiematyčnaha raźmiaščeńnia abjektaŭ na sajcie viedamstva, bližejšyja susiedzi — Darja Domračava i jaje muž Ule-Ejnar Bjorndalen, a taksama mama alimpijskaj čempijonki, jakaja budujecca pobač. Karcinka na miescy całkam hetamu adpaviadaje.
Padychod da vady kala ŭčastku.
Ale voś užo dva hady Žerar Depardźjo ŭ Biełaruś nie pakazvajecca i niejkaj aktyŭnaści na arandavanych sotkach nie nazirajecca — choć abaznanyja krynicy i kažuć, što prajekt hatovy, treba tolki admaška.
Prafesijny vałacuha
Budaŭniki, zaniatyja na inšych VIP-abjektach u Łaparavičach, viedajuć, na kaho zarezervavany ŭčastak. Ale kažuć, što na hety momant niama nijakich namiokaŭ na asvajeńnie terytoryi. I sapraŭdy, ciapier jana bolš nahadvaje ździčełuju sienažać, choć čas ad času siudy pryjaždžajuć rabotniki skasić pustazielle.
Stałych žycharoŭ vioski, jakich z kožnym hodam stanovicca ŭsio mieniej (ledź nia kožnaja druhaja chata vystaŭlenaja na prodaž), patencyjnaje susiedztva z zorkaj kino nie cikavić: družna kažuć, što ad vioski mała što zastałosia, balšynia ludziej novyja, kantaktaŭ ź imi niama — paadharodžvalisia płatami dy syhnalizacyjami. Adnym bolej ci mieniej — nie pryncypova.
U Papiarnianskim sielsaviecie nie zmahli patłumačyć, ci majuć prava ŭłady skasavać damovu, kali ciaham troch hadoŭ nia budzie prynamsi zakładzieny padmurak. Maŭlaŭ, niama pra što havaryć, kali hety termin jašče nie minuŭ.
Dziela spraviadlivaści, nia nadta vierycca, što 70-hadovy Žerar Depardźjo na stała asiadzie ŭ Biełarusi. Jašče śviežy prykład, jak abiacaŭ prapisacca ŭ Bieraści lehienda ŭsiaśvietnaha futbołu, arhientyniec Dyjeha Maradona — usiaho adnaho naviedvańnia chapiła, kab pryznać namier paśpiešlivym.
Dom Darji Domračavaj na susiednim učastku.
Tym bolš što francuz i biez taho «hramadzianin śvietu». Kab paźbiehnuć padatku na raskošu, uviedzienaha byłym kiraŭnikom Francyi Fransua Alandam, jon na niejki čas demanstratyŭna źjechaŭ u Belhiju. U 2013 hodzie prezydent Rasiei Ŭładzimir Pucin padpisaŭ ukaz ab nadańni jamu rasiejskaha hramadzianstva. Atrymaŭšy pašpart z dvuchhałovym arłom, «novy ruski» zajaviŭ pra poŭnuju padtrymku rasiejskaha lidera i hatovaść «pamierci za Rasieju».
Farmalna Depardźjo prapisany ŭ Saransku, administracyjnym centry Mardovii. Maje nieruchomaść u Padmaskoŭi i ŭ Hroznym — prezydent Čačni Ramzan Kadyraŭ padaryŭ vandroŭnamu aktoru dvuchuzroŭnievuju kvateru ŭ centry horadu. Zrešty, u Rasieju jon naviedvajecca hetak ža redka, jak i ŭ Biełaruś.
A letaś čarhovym razam šakavaŭ zajavaj, što źbirajecca pierajechać na stałaje žycharstva ŭ Alžyr. Nie paśpieli medyi absmaktać sensacyju, jak źjaviłasia novaja infarmacyja — maŭlaŭ, choča abmierkavać atrymańnie tureckaha hramadzianstva z prezydentam Redžepam Erdahanam. A dniami ŭ Taškiencie zajaviŭ, što staŭ ambasadaram turystyčnaha brendu Ŭzbekistanu i ciapier budzie prasoŭvać jaho pa ŭsim śviecie.
Praŭda, kali zirnuć na mapu pieramiaščeńnia francuza, bolš za ŭsio času jon pravodzić u Italii, dzie maje vinahradniki. Darečy, u apošni pryjezd u Biełaruś Depardźjo naviedaŭ Mienski zavod vinahradnych vinaŭ, dzie pradehustavaŭ biełaruskaje «ihrystaje». Urešcie damovilisia vypuskać… harełku ź jahonym lahatypam dla rasiejskaha rynku.
Tut moh by žyć Žerar Depardźjo.
Napaleonaŭskija plany pastupova devalvavalisia razam z užo razreklamavanymi prajektami. Kaliści Łukašenka paabiacaŭ vydzielić 2 miljony dalaraŭ na vajenny seryjał «Narmandyja — Nioman», jaki źbiralisia zdymać sumiesnymi namahańniami ŭ Biełarusi, Rasiei i Francyi. Depardźjo, pad jakoha hrošy i vybivalisia, advodziłasia hałoŭnaja rola. Adnak dalej za razmovy sprava nia zrušyłasia.
