Hazieta «Viečiernij Hrodno» pahutaryła z kiraŭnikom administracyi Leninskaha rajonu horadu Barysam Fiodaravym. Siarod inšaha, čynoŭnik parazvažaŭ pra los histaryčnaha centru Hrodna.
Hazieta nahadała jamu jahonaje daŭniaje žadańnie bačyć «histaryčny centr volnym ad žyłych damoŭ. Barys Fiodaraŭ papraviŭ «VH»: «Kali dakładniej, to volnymi nie ad žyłych damoŭ, a ad ludziej, što tam žyvuć. Ich treba pierasialać u narmalnaje kamfartabielnaje žytło. Častku kvateraŭ my ŭžo vyzvalili. Ale jość strymlivajučy faktar. Vyvieści kvateru z žyłoha fondu možna tolki na adnoj padstavie — avaryjnaść niasučych kanstrukcyj i ahulnaja znošanaść budynku. A ŭ žyłym pamiaškańni, zhodna zakanadaŭstvu, nielha zrabić ni kaviarniu, ni kramu. Heta źnižaje pryvabnaść pamiaškańniaŭ u histaryčnym centry dla inviestaraŭ. Z pryniaćciem novaha Žyllovaha kodeksu hetaja prablema pavinna vyrašycca».
Kiraŭnik administracyi pryznajecca, što vielmi lubić stary horad. Jon ličyć, što paśla rekanstrukcyi vulicy Savieckaj i vułak, što da jaje prymykajuć, tut atrymałasia zachavać duch staroha horadu. Sp. Fiodaraŭ kaža, što vielmi pieražyvaŭ za los drevaŭ, jakija ŭ časie toj rekanstrukcyi śpiłavali, ale
«zatoje ciapier Savieckaja — jak na starych paštoŭkach: adkrylisia fasady, źjavilisia pryhožyja lichtary».
Pra Faru Vitaŭta čynoŭnik skazaŭ nastupnaje:
«Ja nie ŭjaŭlaju, u jakaści čaho jaje možna adnavić. Tam byŭ i kaścioł, i carkva. Što ciapier adnaŭlać? Jakoje b ni pryniali rašeńnie, usie adno jano budzie niehatyŭna ŭspryniataje značnaj častkaj haradžanaŭ».
***
Faru Vitaŭta pabudavali naprykancy XIV stahodździa pry kniazi Vitaŭcie Vialikim, tamu za joj zamacavałasia jahonaje imia. U XVI st. pobač z draŭlanaj pabudovaj karol Stefan Batory zbudavaŭ novy muravany chram, jaki pieraniaŭ nazvu papiarednika. Bažnica za svaju historyju nieadnarazova pierabudoŭvałasia, mianiajučy architekturnyja styli i kanfiesijnuju prynaležnaść. U 1804-1918 hh heta byŭ pravasłaŭny Safijski sabor. U 1918 hodzie chram viarnuli katalikam, a paśla druhoj suśvietnaj vajny savieckija ŭłady pieratvaryli Faru Vitaŭta ŭ skład. Nočču 29 listapada 1961 hodu kaścioł uzarvali.
Kaniec 1915 h.
Kaniec 1930-ch.
Tak "pryhažeła" Savieckaja.
