Relihijny fest u chramie Hadchimai ŭ niepalskaj vioscy Baryjapura (niepadalok ad miažy ź Indyjaj) prachodzić raz na piać hadoŭ i viadomy jak samy kryvavy relihijny schod u śviecie. U 2009 hodzie pałomniki abiezhałovili tut kala 500 tysiač bujvałaŭ, nie ličačy inšych žyvioł: koz, hałuboŭ, pacukoŭ, piša bbc.com.
Niekalki hadoŭ tamu abaroncy žyvioł i niekalki dabračynnych arhanizacyj abviaścili, što ŭdałosia damahčysia zabarony zabojstva žyvioł na terytoryi chrama bahini.
Zrešty, tahačasny kiraŭnik chrama adrazu ŭdakładniŭ: «My možam tolki paprasić pravaviernych induistaŭ nie prynosić žyvych achviar bahini, ale nie možam prymusić ich. Ale całkam spynić abo zabaranić tradycyju niemahčyma».
Viarchoŭny sud Niepała taksama vystupiŭ z zaklikam spynić kryvavy rytuał, a ŭłady susiedniaj Indyi, adkul na «śviata» jedzie bolš za miljon pałomnikaŭ, sioleta pastavili na darohach pasty, dzie palicejskija adbirali ŭ handlaroŭ bydła, jakoje jany vieźli praź miažu.
Adnak u hety čaćvier z samaje ranicy abrad pačaŭsia jak zvyčajna — z rytualnaha abiezhałoŭlivańnia hołuba, pacuka, kazła, śvińni i kurycy.
Ale hałoŭnyja achviary — bujvały. U vielizarnym zahonie pobač z chramam kala 200 mužčyn zabivajuć bujvałaŭ ŭdarami kukry — niepalskich nažoŭ, jakija nahadvajuć mačete.
I znoŭ kolkaść zabitych žyvioł pieravysiła sto tysiač.
Na fiestyval źjazdžajucca cełymi siemjami, časam daroha zajmaje niekalki dzion.
Mužčyny z azartam ažyćciaŭlajuć hetyja achviaraprynašeńni, nie majučy nijakaha ŭjaŭleńnia ab humannym zaboi žyvioły, kažuć praciŭniki śviata. Nie ŭsim udajecca adsiekčy hałavu bujvała z adnaho ŭdaru, i časam pracedura zaciahvajecca.
Adnak pałomniki vierać u siłu bahini Hadchimai i ŭ toje, što achviaraprynašeńnie joj dapamoža spraŭdzicca žadańniam. Na fiestyval kožnyja piać hadoŭ źjazdžajucca da dvuch miljonaŭ čałaviek. U zabojstvie bujvałaŭ i inšych žyvioł udzielničajuć tolki abranyja. Astatnija z zadavalnieńniem nazirajuć.
Žrec bahini Hadchimai ŭ dziasiatym kalenie Manhał Čaŭdchary admoviŭsia kamientavać svajo staŭleńnie da masavaha zabojstva žyvych istot, ale adznačyŭ, što z kožnym razam na fiestyval pryjazdžaje ŭsio bolš ludziej.
«My budziem trymacca tradycyj i ździajśniać cyrymonii ŭsiaredzinie chrama. A što ŭžo vierniki robiać za miežami chrama — heta ich ułasnaja sprava», — skazaŭ Čaŭdchary žurnalistam.
