6 śniežnia ŭ Maskoŭskim rajonnym sudzie pieršymi razhledzieli spravy aktyvistaŭ «Jeŭrapiejskaj Biełarusi» Maksima Viniarskaha, Jaŭhiena Afnahiela i Arcioma Čarniaka. Aktyvistaŭ sudzili za «Schod volnych ludziej-2» i šeście da płoščy Niezaležnaści, jakija prajšli ŭ miežach vybarčaj kampanii 16 listapada, piša Radyjo Svaboda.
U sud siabry «Jeŭrapiejskaj Biełarusi» nie źjavilisia i pracesy nad imi prajšli mieniej jak za paŭhadziny. Maksim Viniarski i Arciom Čarniak atrymali štrafy pa 1275 rubloŭ. Vyrak Jaŭhienu Afnahielu pakul nieviadomy, supracoŭniki suda hetych źviestak nie paviedamlajuć.
Hetak ža chutka byŭ aštrafavany aktyvist ź Bieraścia Andrej Šarenda. Jaho štrafam u 1275 rubloŭ pakaraŭ sudździa Jury Maškietaŭ i adrazu pačaŭ razhladać spravu błohiera z Oršy Dźmitryja Kazłova.
Jak prachodzić sud u pustoj zali
«Trymaŭ raściažku «A karol ža hoły» razam z Čarniakom i Mikałajčyk» — tak, pavodle materyjałaŭ spravy, 16 listapada Dźmitry Kazłoŭ udzielničaŭ u schodzie na płoščy Svabody i šeści da Centrvybarkama, dzie na znak pratestu suprać «falšyvych vybaraŭ» spalili paśviedčańni kandydataŭ u deputaty.
Na vyvučeńnie materyjałaŭ spravy ŭ sudździ pajšło 10 chvilin. Śviedak-milicyjantaŭ u sud tak i nie vyklikali, sudździa tolki ahučyŭ ich pakazańni i pajšoŭ raicca. Jašče praz 15 chvilin jon viarnuŭsia i prahučała pastanova: 637 rubloŭ štrafu.
Pakul išoŭ praces nad Dźmitryjem Kazłovym, stała viadoma pra vyraki inšym aktyvistam: Naście Husievaj — 765 rubloŭ, Dzianisu Urbanoviču — 1275 rubloŭ štrafu.
Paśla abiedu, u 14.15, u Maskoŭskim rajonnym sudzie buduć sudzić aktyvistaŭ Natllu Samatyju i Andreja Vojniča.