U kułuarach pasiedžańnia Pałaty pradstaŭnikoŭ karespandent «Našaj Nivy» pahavaryŭ ź Ivanam Mamajkam. Heta adzin z deputataŭ novaha sklikańnia, jakija stali vystupać pa-biełarusku.
Cikava, što svajo deputactva Mamajka jašče niekalki miesiacaŭ budzie spałučać z pasadaj načalnika staŭbcoŭskaj milicyi.
Dyk čamu Mamajka vyrašyŭ vystupać pa-biełarusku?
«Pytańnie dziŭnaje! Biełarus vystupaje na svajoj movie — što tut takoha? Ja liču, što kožny aficyjny vystup treba rabić na svajoj movie. Tak, zaŭsiody budu ŭ parłamiencie vystupać pa-biełarusku», — abiacaje milicyjant.
Pytajemsia, jak časta havoryć pa-biełarusku pa miescu słužby?
«Z ulikam taho, što ŭ nas dvuchmoŭje, sam ja havaryŭ tady, kali da mianie źviartalisia pa-biełarusku. Kali da mianie źviartalisia na druhoj dziaržaŭnaj — karystaŭsia ruskaj.
Kaniečnie, čaściej źviartalisia [pa-biełarusku] hramadzianie, ale byvała, što i supracoŭniki, i na niejkich aficyjnych mierapryjemstvach.
Sam ja skončyŭ biełaruskuju škołu — hetaha mnie dastatkova. Raju čytać pa-biełarusku bolš, tady budzie ŭsio dobra», — skazaŭ Mamajka.
Ivan Mamajka
Naradziŭsia ŭ 1974 hodzie ŭ šmatdzietnaj sialanskaj siamji. Skončyŭ Brescki dziaržaŭny univiersitet pa śpiecyjalnaści «historyja i sacyjalna-palityčnyja dyscypliny» (1996) i Mahiloŭskuju škołu milicyi pa śpiecyjalnaści «pravaznaŭstva» (2004). Z 1996 hoda pracuje ŭ milicyi, z 2014 — načalnik adździeła ŭnutranych spraŭ Staŭbcoŭskaha rajvykankama.
