Praktyka prymianieńnia pakarańniaŭ za administracyjnyja pravaparušeńni budzie źmieniena — adpaviednyja daručeńni daŭ kiraŭnik dziaržavy. Pra asnoŭnyja patrabavańni da budučych papravak žurnalistam raspavioŭ dziaržsakratar Rady biaśpieki Stanisłaŭ Zaś pa vynikach narady ŭ kiraŭnika Biełarusi, pieradaje BIEŁTA.
U liku važnych zadač kiraŭnik dziaržavy nazvaŭ likvidacyju tak zvanaj pałačna-ptušačnaj sistemy, kali administracyjnyja pravaparušeńni fiksujucca dziela składańnia pratakołu i spravazdačnaści, a nie ŭ metach biaśpieki. U asnoŭnym heta tyčycca pracy pravaachoŭnych orhanaŭ.
Pa słovach Stanisłava Zasia, u pracy MUS užo adbylisia stanoŭčyja źmieny paśla narady ŭ kiraŭnika dziaržavy ŭ žniŭni hetaha hoda, ale prablemy jašče zastajucca. «Adrazu pałamać styl pracy tysiač ludziej składana. Tym nie mienš, kali pa ŭsioj viertykali buduć davacca žorstkija prafiesijnyja acenki, situacyja źmienicca. Jana ŭžo mianiajecca i budzie mianiacca dalej», - skazaŭ dziaržsakratar.
Pastupova ŭ śviadomaści pravaachoŭnikaŭ pavinna ŭkaranicca pierakanańnie, što adsutnaść pratakołaŭ na daručanym im učastku śviedčyć ab efiektyŭnaści raboty, dziejsnych prafiłaktyčnych zachadach.
Vyrazna prahučaŭ na naradzie pasył spynić praktyku administracyjnych pakarańniaŭ za praviny, jakija nie ciahnuć niebiaśpiečnych nastupstvaŭ. Mahčymaści dla hetaha pradastaŭleny i dziejučym zakanadaŭstvam, adnak jany vykarystoŭvajucca nie ŭ poŭnaj miery.
«Čamu, naprykład, navat MUS nie ŭ poŭnaj miery karystajecca mahčymaściu zamieny štrafu papiaredžańniem, a abaviazkova składaje pratakoł? Heta subjektyŭny faktar, zaležyć ad ludziej, jakija zajmajucca administracyjnaj praktykaj. Tut bačycca ŭ tym liku žadańnie pakazać vynik, papracavać na statystyku», — ličyć Stanisłaŭ Zaś.
U jakaści prykładu možna pryvieści štrafy za pierachod prajeznaj častki ŭ nienaležnym miescy.
Dla vyrašeńnia prablemy prapanavana skaracić lik struktur, upaŭnavažanych na składańnie administracyjnych pratakołaŭ, i ŭ toj ža čas uzmacnić jurydyčnuju padrychtoŭku tych, chto zachavaje hetaje prava.
Pa daručeńni kiraŭnika dziaržavy stvorana śpiecyjalnaja ekśpiertnaja kamisija z kiraŭnikoŭ dziaržorhanaŭ, parłamientaryjaŭ, navukoŭcaŭ, jurystaŭ. Jany pavinny sistemna pierahledzieć pałažeńni dziejučaha zakanadaŭstva i da lipienia 2020 hoda padrychtavać cełasny dakumient pa ŭdaskanaleńni paradku i ŭmoŭ pryciahnieńnia da administracyjnaj adkaznaści. Kiravać pracaj hrupy budzie namieśnik kiraŭnika Administracyi Prezidenta Volha Čuprys. Hałoŭny pryncyp, pa jakim buduć unosicca źmieny, — pryncyp spraviadlivaści i efiektyŭnaści pradprymanych mier.
