Siarhiej Vieramiejenka atrymaŭ štraf u 30 bazavych (765 rubloŭ), Vadzim Sarančukoŭ — 25 (637, 5 rubloŭ), Ježy Hryhienča i Uładzimir Arcyman — pa 10 (255 rubloŭ). Ich sudzili za akcyju suprać ź intehracyi Biełarusi i Rasii, jakaja prajšła 15 śniežnia na Starym moście. Tady aktyvisty stali ŭ žyvy łancuh, prynieśli płakaty (u tym liku z cytatami Łukašenki ab sajuzie) i bieł-čyrvona-biełyja ściahi, a jašče adpravili karablik z rezalucyjaj ŭ Rasiju. Dazvoł u harvykankama na akcyju nie zapytvali, piša Hrodna.life.
Hryhienču i Arcymana sudzili pa č.1 art.23.34 KaAP RB — «Parušeńnie paradku arhanizacyi abo praviadzieńnia masavych mierapryjemstvaŭ». Sarančukova i Vieramiejenka — pa č.3 art.23.34 KaAP RB — toje ž dziejańnie, učynienaje paŭtorna na praciahu hoda. Darečy, Arcyman i Sarančukoŭ — eks-kandydaty ŭ deputaty Pałaty pradstaŭnikoŭ.
Sarančukova sudzili ŭ sudzie Kastryčnickaha rajona, astatnich — u sudzie Leninskaha rajona. U Leninskim sudzie aktyvistaŭ padzialili. Sudździami byli Bubienčyk, Kozieł i Huryn.
Razhlad sudovych spraŭ prajšoŭ chutka: ad 10 da 20 chvilin. Va ŭsich byli śviedki ź milicyjantaŭ u cyvilnym, jakija viali videazdymku na akcyi. Sudździa Bubienčyk skazaŭ, što Vieramiejenka, udzielničajučy ŭ akcyi, «publična vykazvaŭ staŭleńnie da hramadska-palityčnaha žyćcia». Ježy Hryhienča śćviardžaje, što adzin ź jaho śviedak — Chvalko — chłusić: toj kaža, što ŭ Ježy byŭ płakat, kali jon trymaŭ tolki ściah.
Aktyvisty kažuć, što dziejničali ŭ ramkach art.57 Kanstytucyi — «Abarona Respubliki Biełaruś — abaviazak i śviaščenny doŭh hramadzianina Respubliki Biełaruś».
Aktyvisty nie atrymlivali pozvaŭ ab tym, kab źjavicca ŭ RAUS. Ich čakali ranicaj pad padjezdam. Arcymana i Sarančukova zatrymali, kali jany viali dziaciej u dziciačy sadok. Vieramiejenka — kali jon z žonkaj jechaŭ na pracu. Kali troch aktyvistaŭ zatrymali, Hryhienčy patelefanavali i paprasili spuścicca. Paśla zatrymańnia praces prachodziŭ u ramkach dziejučaha zakanadaŭstva, kažuć aktyvisty.
Hrodziency kažuć, što dla ich heta nie stała niečakanaściu. Jany źviazvajuć zatrymańni ŭ tym liku ź siońniašniaj akcyjaj pratestu ŭ Minsku, na jakuju jany nibyta mahli pajechać.
Aktyvisty buduć abskardžvać rašeńni ŭ abłasnym sudzie.
Mikałaj Salanik, jaki apublikavaŭ u siabie na staroncy ŭ Fejsbuku zaprašeńnie na akcyju, pakul znachodzicca doma. Jon kaža, što ŭ jaho pad domam taksama dziažuryć milicyja, ale jon pakul nie płanuje vychodzić.
