Sud Čyhunačnaha rajona Viciebska vynies prysud 76-hadovaj žančynie, jakaja 20 hadoŭ atrymlivała dźvie piensii, paviedamlaje Tut.by.
Śledstva vyjaviła, što žančyna amal 20 hadoŭ atrymlivała piensiju za vysłuhu hadoŭ, vykarystoŭvajučy zahadzia padroblenyja dakumienty: pradstaŭleńnie kałhasu «Čyrvony Kastryčnik» Haradockaha rajona dla pryznačeńnia piensii, rukapisnuju kopiju pracoŭnaj knižki, daviedku ab zarobku za čas pracy ŭ kałhasie, daviedku ź jaślaŭ-sada № 17 Leninabada (Tadžykistan) ab rabocie vychavalnikam. Adnak u hetych arhanizacyjach žančyna nie pracavała.
U 1995 hodzie abvinavačanaja padała hetyja dakumienty ŭ adździeł sacyjalnaj abarony nasielnictva Słonimskaha harvykankama i zapoŭniła zajavu ab pryznačeńni piensii za vysłuhu hadoŭ.
U 1999 hodzie piensijanierka pierajechała ŭ Viciebsk. Tut jana taksama napisała zajavu na vypłatu piensii. Bolš za toje, pakazała ŭ dakumientach, što inšyja vypłaty nie atrymlivaje. Joj naličyli jašče adnu piensiju, i žančyna rehularna atrymlivała jaje praktyčna 20 hadoŭ.
Suma niezakonnych vypłat skłała bolš za 31 tysiačy rubloŭ.
Piensijanierka całkam pryznała vinu.
Sud pryznaŭ žančynu vinavataj u machlarstvie ŭ asabliva bujnym pamiery, ździejśnienym paŭtorna. Vierdykt - 3 hady pazbaŭleńnia voli. Adnak pakarańnie nie pryviaduć ŭ vykanańnie, kali na praciahu 2 hadoŭ žančyna nia ździejśnić novaha złačynstva.
Pry vyniasieńni prysudu sud ŭličyŭ ŭzrost i stan zdaroŭja abvinavačvanaj.
Prysud moža być abskardžany.
