Staršynia polskaha Sajuza habrejskich relihijnych supołak Klara Kaładziejskaja-Połtyn i hałoŭny rabin Polščy Michael Šudrych zrabili zajavu adnosna abvinavačvańniaŭ prezidenta Rasii Uładzimira Pucina na adras Polščy ŭ tym, što jana vinavataja ŭ raźviazvańni Druhoj suśvietnaj vajny. Ab hetym piša hazieta Rzeczpospolita.
Kiraŭniki polskich judejaŭ nazvali słovy Pucina pra rolu Varšavy ŭ raźviazvańni Druhoj suśvietnaj vajny skandalnaj manipulacyjaj. Pa ich słovach, jaŭrejaŭ asabliva aburaje vykarystańnie dla manipulacyi natatki ambasadara Polščy ŭ Trecim rejchu Juzafa Lipskaha, jaki ŭ 1938 hodzie ŭchvaliŭ ideju Adolfa Hitlera vysłać jeŭrapiejskich habrejaŭ u Afryku.
Pradstaŭniki habrejskaj hramady nahadali, što Polšča sapraŭdy padtrymała emihracyju 10 adsotkaŭ svajho habrejskaha nasielnictva, adnak zrabiła heta častkova ŭ supracoŭnictvie ź sijanisckim rucham, hałoŭnaj idejaj jakoj było abjadnańnie i adradžeńnie jaŭrejskaha naroda na jaho histaryčnaj radzimie — u Izraili. Ruchu, jakomu Polšča tajemna akazvała vajennuju padtrymku. U toj ža čas ŭ 1938 hodzie, kali Treci rejch vyhnaŭ tysiačy polskich habrejaŭ, polskija dypłamaty, u tym liku asabista Lipski, dapamahali im. «Vinavacić jaho ŭ antysiemityźmie, hruntujučysia na adnym skazie, vyrvanym z kantekstu, vielmi biezadkazna», — zajavili polskija habrei.
U zajavie ŭkazana, što falsifikacyja historyi pahražaje sučasnaj jeŭrapiejskaj identyčnaści. Habrejskaja hramada źviarnuła ŭvahu na toje, što niamieckija ŭłady nie chavajuć praŭdu pra vajnu. Taho ž jany pažadali i rasiejskim uładam.
30 śniežnia premjer-ministr Polščy Mateuš Maraviecki zajaviŭ, što Pucin naŭmysna sprabuje abyłhać Varšavu dziela hieapalityčnych metaŭ.
Tema pieradvajennaj palityki šerahu jeŭrapiejskich dziaržaŭ była niečakana zakranutaja Pucinym na śniežańskim samicie z udziełam lidaraŭ krain SND. Ahułam niehatyŭnuju acenku roli Polščy Pucin za apošnija tydni paŭtaryŭ čatyry razy, u tym liku na pašyranym pasiadžeńni kalehii Ministerstva abarony Rasii. Słovy Pucina dali start dla masavaj antypolskaj kampanii ŭ rasijskich ŚMI. Analityki razychodziacca ŭ acency pryčyn, čamu takaja ataka na Polšču adbyłasia mienavita ciapier.
