U efiry telekanała STB 1 studzienia adbyŭsia dastatkova niestandartny vypadak. Žurnalistka Alena Kazłova padčas žyvoha ŭklučeńnia ŭ efir dziŭna chistałasia i nie nadta ćviorda vymaŭlała słovy.
Karystalniki internetu navat pačali žartavać, što karespandentka mahła być pjanaj. Pikantnaści dadavała toje, što va ŭklučeńni havorka viałasia pra zabieh ćviarozaści, jaki adbyŭsia 1 studzienia kala Pałaca sportu.
Videa z Alenaj Kazłovaj za ličanyja hadziny pieršaha dnia hoda stała virusnym. Jano «kačavała» pa sacsietkach, telehram-kanałach i navat infarmacyjnych sajtach. «Naša Niva» źviarnułasia pa kamientar da samoj žurnalistki, ale jana pieranakiravała da namieśnika hienieralnaha dyrektara STB Kiryła Kazakova.
«Žurnalistka mocna chvalavałasia. Vy ž, kaniečnie, nie bačyli kancoŭku videa? Jana navat straciła prytomnaść»,
— raskazaŭ Kazakoŭ. Pa jahonych słovach, Alena Kazłova pracuje na STV kala paŭhoda, a navahodni repartaž byŭ adnym ź pieršych u jaje pracy žyvych efiraŭ. «Takoje byvaje z maładymi žurnalistami, što jany pierachvalujucca.
Ni pra jaki ałkahol havorki być nie moža. U nas strohaje praviła, što ŭžyvać ałkahol padčas pracy zabaroniena», — raskazaŭ pradstaŭnik STB.
Kirył Kazakoŭ paviedamiŭ, što 2 studzienia ŭ Aleny Kazłovaj dzień adpačynku, balničny jana nie brała.
