«Dziakujučy tamu, što ciapier aktyŭna abmiarkoŭvajecca azdableńnie novych stancyj mietro, mastackaja rada źbirajecca časta. Tak što, miarkuju, na nastupnym tydni pytańnie i z ustalavańniem šyldy Bykava budzie razhledžanaje», — raskazvaje Ihar Zasimovič.
Da prahnozaŭ, što došku paśpiejuć ustalavać da Dnia Rodnaj Movy, jaki adznačajecca 21 lutaha, skulptar stavicca skieptyčna.
«Chutčej za ŭsio, nie. U lutym došku nijak nie ŭstalujuć. Tamu što navat ź jaje miescam uźnikajuć sprečki i pytańni. Toje, što jana źjavicca na domie № 10 pa vulicy Tanka, dzie žyŭ i pracavaŭ Vasil Bykaŭ, heta biassprečna. Inšych varyjantaŭ prosta być nie moža. Kali b była vulica Bykava, tady b varyjantaŭ było bolej. Miesca ŭ dvary, jakoje ja prapanavaŭ, rada nie ŭzhadniła. A na fasadzie doma paŭsiul prybudavanyja šklanyja kaviarni, miesca raźmiaścić šyldu amal niama. Ale, zdajecca, pasiarod doma, my padabrali bolš-mienš prydatnaje miesca. Kali jaho ŭzhodniać, nieabchodna budzie mianiać eskiz doški: rabić partret piśmieńnika bolš bujnym, sama doška taksama stanie bolš doŭhaj», — kaža skulptar.
Jak budzie vyhladać doška Ihar Zasimovič pakazvać admoviŭsia.
«Na słovach raskažu, a pakazać vyjavu pakul budzie pamyłkaj. Tamu što kančatkovy vyhlad praca atrymaje tolki tady, kali ja budu viedać, dzie jana kankretna budzie ŭstalavanaja. Mahu skazać, što pa zadumcy miemaryjalnaja doška Bykavu budzie padobnaja na došku Ryhora Baradulina»,— tłumačyć aŭtar.
Fota Hleba Łabadzienki.
«Budzie vialiki partret, nadpis, što heta narodny piśmieńnik Biełarusi. Ukazanaja infarmacyja, što ŭ hetym domie žyŭ i stvaraŭ z 1978 pa 2003 Vasil Bykaŭ. A sama šylda budzie niestandartnaj formy», — padzialiŭsia Ihar Zasimovič.
