9000 čałaviek sabraŭ kancert Lapisaŭ. Fota BiełaPAN
9 sakavika «Lapis Trubiackoj» prezientavaŭ u Minsku našumieły albom «Manifiest». Kala 9 tysiač čałaviek pryjšło ŭ Pałac sportu na Niamihu, kab pačuć lubimy hurt.
Kab trapić u pałac, tre było prastajać šmatmietrovuju čarhu. Amonaŭcy staranna treśli ŭsich, kab nichto nie pranios ničoha zabaronienaha. Takoha ažyjatažu nie było navat padčas pryjezdu suśvietnych zorak, jak Tarja Turunien i Sepultura.
Što da samoha kancertu, to jon udaŭsia biez usialakich ale, niezadavolenych u hety viečar nie było. Užo ad pieršaj pieśni — «Da nas pryjechaŭ Trubiackoj» — zale byŭ zadadzieny adpaviedny ton. Tyja, chto byŭ na tancplacoŭcy, užo mahli vykručvać ad potu svaje kašuli i majki. Usie adryvalisia pa poŭnaj.
Uvieś u tatuiroŭkach Michałok davaŭ žaru, nie škadujučy svajoj hłotki (hołas sarvaŭ užo ŭ pieršaj častcy vystupu) i taksama inšych častak cieła. Na praciahu ŭsiaho vystupu muzyki ździajśniali niejmaviernyja akrabatyčnyja truki.
U pierapynkach miž vystupami Michałok čytaŭ «epičnyja čytałki» Juzika Kileviča, a taksama ŭłasnyja manałohi. Naprykład, pra toje, što nas prymušajuć siabravać ź Vieniesuełaj. Kožnaja pieśnia supravadžałasia admysłovym videašeraham. Kali pačali vykonvać «Kapitał», na ścianie źjavilisia i kadry ź viadomaha klipu. Było cikava, ci pakažuć PPRB. Nie, nie pakazali. Z usich piaci dyktataraŭ, što fihuravali ŭ klipie, pakazali tolki niabožčyka Chusiejna. Łukašenku z Kastra, Čaviesam i Achmadziniežada ŭsio ž vyrazali.
Kali zahučała pieršaja biełaruskamoŭnaja pieśnia «Zorački», u natoŭpie źjaviŭsia pieršy bieł‑čyrvona‑bieły ściah.Potym druhi. Nichto tak i nie sprabavaŭ ich adabrać. I ściahi prałunali až da zakančeńnia kancertu.
«Viarnicie nam pavahu biez kryvi i revalucyi», — paprasiŭ sa sceny Michałok pierad tym, jak pačaŭ śpiavać «Załaty hadzińnik u čornaj varony, Chłopiec durny, jak małpa z karonaj». I
ŭsia zała ŭ ahulnym paryvie śpiavała pra Pahoniu, što pobač, a taksama paŭtarała biaskoncuju kolkaść razoŭ śledam za artystam Belarus freedom.
Hetaja pieśnia ŭpieršyniu była vykananaja na Radzimie, nasupierak raniejšym zajavam, što ŭ Biełarusi jaje śpiavać nie buduć.
Novyja «Lapisy» zaŭvažna kantrastujuć z byłymi apalnymi rok‑hurtami, jakija paśla słavutaha pachodu ŭ Administracyju prezidenta paźbiahajuć vykonvać na kancertach svaje najbolš palityčnyja i pravakacyjnyja kampazicyi.
Čaho bajacca, kali za taboju — 9‑tysiačnaja zała?
«Lapisy» vykanali amal usie pieśni z novaha albomu, a taksama častku starych chitoŭ. Na bis hurt zaśpiavaŭ jašče dźvie absalutna novyja temy — «Buravieśnik» i «Viasiołyja kački». Ciapier hurt čakaje turne pa inšych haradach krainy. Napeŭna, i tam budzie nie mienš horača.
Hladzi taksama fotarepartaž Julii Daraškievič z kancertu «Lapisa»
