Kurs dalara pabiŭ letašni rekord. 10 lutaha kurs dalara skłaŭ 2,178 biełaruskaha rubla. Ci źviazany rost z vynikam naftavych pieramoŭ? Jak biełaruski rubiel vytrymaje rašeńnie kuplać rasijskuju naftu pa rynkavych cenach?
Ekanamist Siarhiej Čały pamiž hetymi padziejami suviazi nie bačyć.
«Va ŭsim śviecie raście dalar. Tak, u nas, napeŭna, jość niejkaje pavyšeńnie popytu, ale nie dumaju, što jano mocna źviazana z hetym źniešnim faktaram. Heta niejkija kanjunkturnyja chistańni.
Što budzie z dalaram, nasamreč vielmi składana kazać, bo aficyjnaja palityka Nacbanka takaja: u ich niama mety trymać peŭny kurs. Pieršaja reakcyja na źniešnija šoki jakraz-taki pavinna pryvodzić da źmienaŭ kursa, kab viartać makraekanamičnuju raŭnavahu. U Nacbanku całkam byli b navat rady hetym aŭtamatyčnym źmienam.
Inšaja sprava, što hod vybarčy. Tut zadača ekanamičnaja moža piarečyć zadačy palityčnaj — demanstravać stabilnaść».
Siarhiej Čały nie bačyć surjoznych ryzyk, «dla taho kab my značnyja ruchi kursa zaŭvažyli».
Jon nahadvaje, što niekalki razoŭ u nas užo byŭ davoli vialiki rost dalara i Nacbank nijak nie ŭmiešvaŭsia. Urešcie, kurs potym viartaŭsia.
«Ciapier treba hladzieć na chistańni rubla nie jak na padstavu chvalavacca, a naadvarot — heta zdarovaja reakcyja narmalnaj ekanomiki», — padsumoŭvaje ekśpiert.
Z čym źviazany rost dalara va ŭsim śviecie, składana adkazać.
«Vierahodna, i Breksit niejkuju rolu adyhraŭ, i toje, što adbyvajecca z rynkami syraviny. Treba viedać, što rost kursa — heta nie niejki naš fienomien. Kali pahladzieć, mnohija valuty suprać dalara ŭ apošni miesiac asłabli», — kamientuje Siarhiej Čały.
A voś staršy analityk kampanii «Alpary» Vadzim Josub, naadvarot, ličyć, što ciapierašniaja źmiena valutnaha kursa ŭpirajecca ŭ situacyju z naftaj.
«Asnoŭnaja niavyznačanaść źviazana sa skaračeńniem pastavak rasiejskaj nafty, i efiekt ad hetaha my ŭžo na sabie adčuvajem apošnija tydni.
Vierahodniej za ŭsio, mocna skaraciłasia valutnaja vyručka ad ekspartu naftapraduktaŭ i, jak vynik, zamiežnyja valuty rastuć. Voś dalar spačatku hoda ŭžo bolš, čym na 3,5% vyras.
Apošniaja zajava vice-premjera Krutoha nakont pieramoŭ pa nafcie, z majho punktu hledžańnia, ničoha nie aznačaje. U nas cana na naftu składajecca pa formule «rynkavy košt — ekspartnaja pošlina + premija». Ułasna kažučy, vakoł premii rasiejskim pradaŭcam nafty i byŭ kanflikt apošnija dva miesiacy i nakont ich pavinny byli iści pieramovy. Ad taho, nakolki chutka ŭdasca damovicca, na jakich umovach, vielmi mocna budzie zaležać dynamika kursa. Ciapier pakul niezrazumieła, ni jakaja budzie cana, ni jakija buduć abjomy, ni kali hetyja abjomy pojduć. Tamu prahnozy rabić składana», — dzielicca Vadzim Josub.
Što da nastupnych vybaraŭ, to, pa słovach ekśpierta, jany nie pavinny paŭpłyvać na kurs dalara — z 2015 hoda jon składajecca pad uździejańniem popytu i prapanovy, a nie vyznačajecca ŭładaj.
«Makraekanamičnaja palityka ŭrada i Nacbanka dastatkova adekvatnaja. Inflacyja źnižajecca, dyrektyŭnyja kredyty taksama pastupova skaračajucca. Pad vybary čakajecca rost zarobkaŭ biudžetnikaŭ, ale hetyja srodki byli praduhledžany ŭ biudžecie, značyć, hrošaj na heta drukavać nie buduć. Tamu čysta pad vybary nijakich siurpryzaŭ na valutnym rynku ja b nie čakaŭ», — adznačaje analityk.
Pra toje, što niavyznačanaść pa naftavym pytańni ŭpłyvaje na kurs, kaža i ekanamist Dźmitryj Kruk.
«Kali hetaja niapeŭnaść praciahniecca, čakańni mohuć pahoršać, i, adpaviedna, nasielnictva i pradpryjemstvy taksama mohuć pavialičyć svoj popyt na zamiežnuju valutu», — miarkuje ekśpiert.
Dźmitryj Kruk nie vyklučaje horšych scenaroŭ.
«Kali situacyja dla biełaruskaj ekanomiki budzie zusim niespryjalnaja, to mahčyma, što vahańni kursa buduć davoli istotnymi — da 15%».
