11 lutaha ŭ Pružanach vynieśli prysud byłomu supracoŭniku milicyi, jaki abvinavačvaŭsia ŭ pjanym DTZ z zahinułym i pakidańni ŭ niebiaśpiecy, paviedamlaje Tut.by.
Eks-milicyjant pryznany vinavatym i ŭ parušeńni PDR u stanie apjanieńnia, jaki paciahnuŭ śmierć čałavieka, i ŭ pakidańni ŭ niebiaśpiecy — i jamu pryznačana pakarańnie ŭ vyhladzie 7 hadoŭ kałonii ahulnaha režymu, piaci hadoŭ pazbaŭleńnia pravoŭ, a taksama štrafu ŭ 300 bazavych vieličyniaŭ (8,1 tys. rubloŭ).
Maci zahinułaha piešachoda atrymaje ad UUS Bresckaj vobłaści — ŭładalnika słužbovaha aŭtamabila, jakim byŭ učynieny najezd, — 20 tys. rubloŭ kampiensacyi maralnaj škody.
Prysud nie ŭstupiŭ u zakonnuju siłu.
Były kapitan milicyi, 44 hadovy Siarhiej Puchnarevič 18 červienia minułaha hoda kala 22.45 niepadalok ad vioski Łasasin na słužbovym aŭtamabili źbiŭ mužčynu, jaki lažaŭ na krai prajeznaj častki, i źjechaŭ ź miesca avaryi. Paciarpiełaha znajšli adnaviaskoŭcy. Jany paviedamili pra heta ŭ milicyju i vyklikali chutkuju. Ad atrymanych traŭmaŭ paciarpieły pamior u balnicy.
Abvinavačany nie pryznaŭ viny ni pa adnym z punktaŭ abvinavačańnia — maŭlaŭ, nie piŭ i nikoha nie źbivaŭ.
Śledstva vyjaviła, što najezdu papiaredničała mierapryjemstva sa śpirtnym siarod miascovych supracoŭnikaŭ milicyi. Usie jany stajali ŭ sudzie na adnym: ałkahol na stale byŭ, bačyli, što Puchnarevič sabie nalivaŭ, — ale ci piŭ, nichto nie ŭpeŭnieny. Dvoje kalehaŭ, pavodle śledstva, bačyli, što Siarhiej siadaŭ za rul słužbovaha aŭtamabila, ale jany jamu nie pieraškadžali i ŭ apieratyŭna-dziažurnuju słužbu nie paviedamlali, vynikaje z materyjałaŭ. Abodva ŭ milicyi ŭžo nie pracujuć.
