Kolkaść narkazłačynstvaŭ u Biełarusi źmienšyłasia, adnak uzrasła kolkaść narkotykaŭ, jakija byli kanfiskavanyja, zajaviŭ ministr unutranych spraŭ Juryj Karajeŭ, pieradaje BIEŁTA.
Juryj Karajeŭ. Fota Nadziei Bužan
Jak adznačyŭ Karajeŭ, u 2019 hodzie było ździejśniena kala 4,5 tysiač złačynstvaŭ, źviazanych z narkotykami. Ź ich pałova — heta zbyt. Niahledziačy na toje, što narkazłačynstvaŭ stała mienš, pavialičyłasia kolkaść narkotykaŭ, jakija byli kanfiskavanyja, kali hladzieć na vahu.
«Samaje hałoŭnaje dasiahnieńnie: pačynajučy z 2015 hoda kolkaść vypadkaŭ pieradazirovak ź niepaŭnaletnimi i, adpaviedna, ich śmierciaŭ skaraciłasia ŭ 37 razoŭ. U paraŭnańni z 2018 hodam — u try razy», — dadaŭ ministr.
Pavodle jaho słoŭ, kanfiskavanaja ŭ 2019 hodzie vielizarnaja partyja narkotykaŭ (550 kh hierainu) aznačaje, što dla transnacyjanalnych hrupovak Biełaruś pa-raniejšamu zastajecca pryvabnaj u tranzitnym płanie krainaj.
«Da nas i praz nas iduć pastaŭki jak z uschodu, tak i z zachadu, — kanstatuje ministr. — Raślinnyja narkotyki ŭ asnoŭnym iduć z uschodu na zachad, a sintetyčnyja — z zachadu na ŭschod. Sintetyčnyja — najbolš niebiaśpiečnyja, ich usiaho 5% u ahulnym śpiektry, ale mienavita ad ich 60% pieradazirovak».
Jak padkreśliŭ Juryj Karajeŭ, padraździaleńni pa baraćbie z narkotykami ŭ pieršuju čarhu pieranaceleny na vyjaŭleńnie nie drobnych spažyŭcoŭ, a bujnych partyj i kanałaŭ. U cełym MUS maje namier aktyŭna zajmacca prafiłaktykaj.
Kiraŭnik viedamstva taksama nahadaŭ, što pa inicyjatyvie Ministerstva ŭnutranych spraŭ u RNPC psichičnaha zdaroŭja stvorany piłotny centr praciahłaj reabilitacyi narkazaležnych. «My pahladzim na vyniki jaho pracy i budziem aktyŭna sadziejničać tamu, kab ź piłotnaha jon staŭ pastajannym, kab takich centraŭ było bolš», — dadaŭ ministr.