Hramadski lidar, biźniesmien, były kiraŭnik «Maładoha frontu» Źmicier Daškievič apošnim časam krychu admiežavaŭsia ad palityčnaj dziejnaści.
Nie było Źmitra na akcyjach u abaronu niezaležnaści, jakija prachodzili ŭ śniežni. Ciapier ža Daškievič nijakim čynam nie ŭdzielničaje ŭ pracedury abrańnia adzinaha kandydata ad apazicyi.
«Naša Niva» raspytała Źmitra Daškieviča, ci sapraŭdy jon vyrašyŭ skancentravacca na hramadskaj dziejnaści zamiest palityki?
«Jakaja tut dziejnaść? Ja staju raz na tydzień, u piatnicu, na varcie ŭ Kurapatach. I na piłaramie piłuju doški. Treba pracavać, a nie zajmacca myšynaj vałtuźnioj. U nas jość prablema, što my časta havorym słovy, ale nie razumiejem ich sens.
Kažacie pra palityku, a što razumieć pad palitykaj? Vyłučeńnie adzinaha kandydata? Ja nazyvaju heta nie palitykaj, a prafanacyjaj. Ja daŭno pryniaŭ rašeńnie, jašče kali apošni raz adkinuŭsia, i starajusia jaho prytrymlivacca: bolš nie zajmacca prafanacyjaj», — skazaŭ «NN» Źmicier Daškievič.
