Padčas boju 18 lutaha na Łuhanščynie zahinuŭ 34-hadovy biełaruski hramadzianin Anton Karovin, jaki z 2014 hoda vajavaŭ na baku bajevikoŭ. Siabry biełarusa raspaviali belsat.eu, što jon skončyŭ histfak BDU, byŭ «idejnym kamunistam» i vajavaŭ na Danbasie razam sa svaim baćkam.
Na Danbasie ranicaj 18 lutaha bajeviki pad prykryćciem ahniu bujnakalibiernych minamiotaŭ atakavali pazicyi padraździaleńniaŭ ukrainskaj armii pablizu nasielenych punktaŭ Navataškoŭskaje, Arechava, Krymskaje, Chutar Volny. Prezident Ukrainy Uładzimir Zialenski nazvaŭ ataku bajevikoŭ «cyničnaj pravakacyjaj» i «sprobaj sarvać mirny praces na Danbasie». U toj ža dzień było sklikana pasiadžeńnie Rady Biaśpieki AAN, dzie abmiarkoŭvałasia abvastreńnie situacyi na ŭschodzie Ukrainy.
Pavodle naziralnikaŭ, takich šyrokamaštabnych bajavych dziejańniaŭ na Danbasie nie było z 2018-ha hoda. Ataka prarasijskich sił była adbita prykładna a 10-j hadzinie. Adzin ukrainski vajskoviec zahinuŭ, jašče čaćviora atrymali ranieńni. Straty bajevikoŭ: adzin zabity, piaciora paranienyja. Jak vyśvietliłasia, imia zahinułaha bajevika — Anton Karovin, pazyŭny «Voŭk». Jon byŭ hramadzianinam Biełarusi.
Kamunist na Danbasie
Anton Karovin naradziŭsia ŭ 1986 hodzie ŭ Miensku, skončyŭ histaryčny fakultet BDU. U biełaruskim vojsku nie słužyŭ — nibyta mieŭ adterminoŭku pa zdaroŭju.
Anton Karovin. Fota pradastaŭlena siabram biełarusa.
Pavodle znajomych, Anton sa školnych hadoŭ byŭ «idejnym kamunistam» i «dumkami žyŭ u SSSR». Byŭ pierakanany, što Biełaruś, Rasija i Ukraina — heta častki adnoj krainy. Kali pačaŭsia rasijska-ukrainski kanflikt, Karovin spačatku zajmaŭsia infarmacyjnaj padtrymkaj vajny — administravaŭ antymajdannyja supołki ŭ sacsietkach. A potym i sam pajechaŭ na Danbas.
Na vajnu jon trapiŭ u składzie Dobraachvotnaha kamunistyčnaha atradu (DKA) — rasijskaj hrupoŭki bajevikoŭ levych pohladaŭ. Atrad uvajšoŭ u skład farmavańnia «Pryvid» pad kiraŭnictvam palavoha kamandzira Alaksieja Mazhavoha. Bajcy DKA vajavali pad čyrvonym ściaham i z šaŭronami ŭ vyhladzie čyrvonych zorak ź siarpom i mołatam.
Anton Karovin źleva. Fota z sacyjalnych sietak.
Pierad zakidam na Danbas bajeviki DKA prachodzili padrychtoŭku ŭ centry «Partyzan» u Sankt-Pieciarburhu. Tudy ŭ listapadzie 2014 hoda trapiŭ i miančuk Anton Karovin.
«Ja tady tolki što viarnuŭsia ź lasnoha łahiera, dzie prachodziŭ zaviaršalny etap bajavoha zładžvańnia našaj pieršaj hrupy, a jon i jašče para čałaviek tolki pryjechali. U našu apošniuju noč my načavali ŭ spartzale, na matach, a ŭ nastupnuju zahruzilisia ŭ aŭtobus i pačali naš šlach na poŭdzień», — raspavioŭ sasłužyviec biełarusa, eks-bajavik za pazyŭnym «Norman».
«Norman» kaža, što Karovin byŭ «dobrym sałdatam», chacia raniej vajskovaha dośviedu nie mieŭ. «Na pieršych ža navučalnych strelbach jon pakazaŭ siabie dobrym strałkom, tamu byŭ zaličany snajpieram», — uspaminaje bajavik. Karovin u «ŁNR» dasłužyŭsia da «siaržanta».
«Ich tut niama»
Biełarus Anton Karovin razam z bajcom ź Jakucii na Danbasie. Fota z sacyjalnych sietak.
U 2015 hodzie Karovin prymaŭ udzieł u bajach za Debalcava — adnoj z samych bujnych apieracyj vajny na Danbasie. Mienavita da hadaviny tych bajoŭ była prymierkavanaja ataka bajevikoŭ 18 lutaha 2020 hoda, dzie biełarus i zahinuŭ.
Siabroŭka Antona z Sankt-Pieciarburhu dasłała karespandentu belsat.eu svaju pierapisku z «Voŭkam», dzie toj raspaviadaŭ pra šturm Debalcava 8 lutaha. Atrymlivajecca, što pobač z hrupoŭkaj, dzie vajavaŭ Karovin, Debalcava šturmavała «PVK Vahnera» — tady pra hetaje padraździaleńnie najmitaŭ jašče mała chto viedaŭ. «Šturm 8 lutaha całkam pravaliŭsia. U našych byli strašnyja straty», — pisaŭ biełaruski bajavik.
Darečy, jak vynikaje ź pierapiski, Karovin u razmovach sa znajomymi nie kryvadušničaŭ u acenkach situacyi na Danbasie: biełarus vidavočna iranizuje nakont taho, što rasijskaha vojska «tut niama» i pryznaje, što «apałčeńnie prajhraje va ŭsich adnosinach ukrainskaj armii».
U sacsietkach «Voŭk», u adroźnieńnie ad inšych bajevikoŭ, staraŭsia nie śviacicca: biełarus mieŭ u «Vkontaktie» zakrytuju staronku pad psieŭdanimam «Anton Zialenski». Znajomyja pryhadvajuć, što paśla Debalcava, u 2015 hodzie, «Voŭk» niekalki razoŭ svabodna pryjazdžaŭ u Biełaruś i prablem z KDB nibyta nie mieŭ.
Baćka razam z synam
Baćka «Vaŭka» Dźmitryj Karovin taksama vajuje na Danbasie. Heta — absalutna ŭnikalny vypadak dla Biełarusi, kali vajavać na Danbasie pajechali adrazu i syn, i baćka.
«Jon (baćka zahinułaha biełarusa — zaŭv. belsat.eu) byŭ u «apałčeńni». Pamiataju, heta było jašče da Debalcava, jon pryjazdžaŭ da nas na bazu častki, u Ałčeŭsk. Jany z «Vaŭkom» siadzieli ŭ kalidory, doŭha razmaŭlali. Ja viedaju, što ŭ čas Debalcaŭskaj apieracyi baćka Antona byŭ paranieny pad Nikišynam», — raspavioŭ «Norman».
Sapraŭdy, va ŭkrainskaj bazie «Miratvorac» jość dadzienyja Dźmitryja Barysaviča Karovina 1959 hoda naradžeńnia. Pavodle ŭkrainskich krynic, sam jon uradženiec Danieččyny, ale ŭ kancy 80-ch słužyŭ u savieckaj armii ŭ Barysavie i potym zastaŭsia ŭ Biełarusi.
Miarkujučy pa infarmacyi z adkrytych krynic, u 90-ch Dźmitryj Karovin sprabavaŭ zajmacca biźniesam. Pavodle siabroŭki «Vaŭka» ź Pieciarburhu, biźniesam taksama zajmałasia i maci Antona, adnak apynułasia ŭ vielizarnych daŭhach. Siamja trapiła ŭ vielmi ciažkaje finansavaje stanovišča, straciła kvateru. Maci źjechała ŭ Maskvu. Budučy bajavik byŭ vymušany pracavać kładaŭščykom.
«Mała dobraha ŭ jaho było ŭ žyćci, ja tak razumieju. Ale jon nikoli nie skardziŭsia i nie nyŭ, naadvarot staraŭsia mianie padtrymlivać. Ledź nie kožny dzień dasyłaŭ mnie cikavyja artykuły pra historyju, karcinki z kocikami», — kaža dziaŭčyna pra snajpiera «ŁNR».
Anton Karovin zahinuŭ pry minamiotnym abstrele — mina vybuchnuła za jahonaju śpinaju. Na toj momant biełarus užo byŭ paranieny i rychtavaŭsia da evakuacyi ŭ tył. Pachavajuć «Vaŭka» na Łuhanščynie ŭ Ałčeŭsku.
Siabroŭka pryhadvaje, što adnojčy Karovina pieraviali ŭ štab bajevikoŭ i pasadzili za papiarovuju pracu. «Ja jamu tady kazała: ty ž užo navajavaŭsia, zastańsia pry štabie. I viedajecie, što jon adkazaŭ? «Nu voś spytaje mianie ŭnuk praz šmat hadoŭ: a čym ty, dziadula, zajmaŭsia ŭ hetuju vajnu? Dy ŭ asnoŭnym, unučak, pierakładaŭ papierki»… Nu voś: ciapier užo nichto nikoli nie spytaje», — zaklučaje dziaŭčyna.
***
Z ulikam «Vaŭka» z 2014 pa 2020 hoda ŭ bajavych dziejańniach na Danbasie zahinuła minimum 12 biełarusaŭ, što vajavali na baku «ŁDNR». Jašče troje biełarusaŭ-bajevikoŭ pamierli pry inšych (nie bajavych) abstavinach — dvoje ad chvarob i adzin u vyniku zvyčajnaha kryminału.
Adzin biełarus — Aleś Čarkašyn — zahinuŭ na Danbasie, vajujučy za Ukrainu.
