Biełaruskaja fiederacyja futboła pryniała rašeńnie, što čempijanat krainy startuje, jak i było zapłanavana, 19 sakavika. U hety dzień u Minsku zhulajuć «Enierhietyk-BDU» i BATE, a ŭ Salihorsku — «Šachcior» i «Tarpieda-BiełAZ». Bolš za toje, na matčach zmohuć prysutničać hledačy.
Redžep Taip Erdahan i Alaksandr Łukašenka.
Takim čynam, na siońniašni momant u Jeŭropie zastajucca ŭsiaho tolki dva nacyjanalnyja čempijanaty, jakija nie ŭziali paŭzu ŭ suviazi z raspaŭsiudam karanavirusa — heta Biełaruś i Turcyja. Pry hetym matčy tureckaha pieršynstva prachodziać biez trybun. U Turcyi na siońnia vyjaŭlena 47 nośbitaŭ karanavirusa, u Biełarusi — 36.
Na hetych vychadnych hulni prachodzili jašče ŭ Rasii, Ukrainie, Vienhryi, Sierbii, ale ŭ pačatku tydnia ŭsie hetyja krainy vyrašyli prypynić rozyhryšy.
Spynilisia taksama topavyja jeŭrapiejskija čempijanaty. Naprykład, anhlijskaja Premjer-liha ci niamieckaja Bundeśliha aptymistyčna mierkavali, što adnoviać čempijanaty ŭ pačatku krasavika. Pakul hetyja rašeńni nichto nie admianiaŭ, ale šancaŭ na heta, zdajecca, vielmi mała.
Spynilisia rozyhryšy futbolnych Lihi čempijonaŭ i Lihi Jeŭropy. Niezrazumieła, jakim čynam i kali hetyja turniry mohuć być uznoŭlenyja.
Amierykanskaja Nacyjanalnaja baskietbolnaja asacyjacyja (NBA) aficyjna ŭziała paŭzu na minułym tydni na tryccać dzion, ale bolš vierahodnym bačycca varyjant, što turnir adnovicca tolki ŭ kancy červienia. Amal dakładna, što hulać baskietbalisty pry hetym buduć pry pustych trybunach.
Pakul što pazityŭnyja tendencyi ŭ hetym kirunku dajuć tolki azijackija krainy. Na minułych vychadnych paśla miesiačnaj paŭzy adnaviŭsia čempijanat Japonii pa baskietbole. 4 krasavika maje praciahnucca i čempijanat Kitaja pa hetym vidzie sportu.
Chacia mnohija amierykanskija lehijaniery i admaŭlajucca viartacca ŭ Kitaj. Terminaŭ pa ŭznaŭleńni čempijanataŭ hetych krain pa futbole pakul niama.
Siońnia ž aficyjna byŭ pieraniesieny na 2021 hod čempijanat Jeŭropy pa futbole. A voś Alimpijadu — 2020 u Tokia japoncy ŭsio ž spadziajucca pravieści, jany navat nie razhladajuć inšych varyjantaŭ. Pa-raniejšamu niama peŭnaści z chakiejnym čempijanatam śvietu. Jon musiŭ adbycca ŭ pačatku maja ŭ Šviejcaryi. Razhladajecca navat taki varyjant, što turnir mohuć pieranieści ŭ Biełaruś.