Hienprakuratura prapanoŭvaje štrafavać baćkoŭ, čyje dzieci znachodziacca ŭ poźni čas na vulicy.
U prakuratury zaniepakojenyja tym, što z 21.00 da 7.00 padletkami ździajśniajecca pałova złačynstvaŭ i ŭ hety ž čas jany čaściej za ŭsio sami stanoviacca achviarami napadzieńnia - jak adnahodkaŭ, tak i darosłych złačyncaŭ.
Adkul nohi rastuć?
Na hetu ideju supracoŭnikaŭ Hienprakuratury natchniŭ dośvied susiedniaj Rasii. Tam dva hady tamu ŭ dvanaccaci rehijonach pryniali padobny zakon, što pryviało da skaračeńnia złačynstvaŭ.
Sens novaha zakonaprajekta ŭ tym, kab u poźni čas dzieci kali i znachodzilisia ŭ hramadskich miescach, to abaviazkova ŭ supravadžeńni baćkoŭ.
U Biełarusi taki mietad užo prymianiaŭsia, ale nie na zakanadaŭčym, a na vykanaŭčym uzroŭni. Z 1999 pa 2005 hod usie abłvykankamy prymali rašeńni, jakija zabaraniali niepaŭnaletnim źjaŭlacca ŭ hramadskich miescach biez supravadžeńnia darosłych. Administracyjnaja adkaznaść prypisvałasia za parušeńnie hetaha rašeńnia, ale štrafavać baćkoŭ biez adpaviednaha zakonu było nielha.
Baćki na dyskateki chadzić nie buduć!
Inha Siŭčykava, kłasnaja kiraŭnica adnoj sa staličnych himnazij, novy zakonaprajekt kamientuje tak:
— Na maim dośviedzie pa takim pravaparušeńni ledź nie byli pakarany baćki adnoj z maich vučanic. Pozna viečaram jana vyjšła na hanak, baćki byli ŭ hety čas doma. Mima prajazdžała milicejskaja mašyna, dziaŭčynu zatrymali i advieźli ŭ adździaleńnie. Prybiehli ŭschvalavanyja baćki, zmahli rastłumačyć situacyju, abyšłosia. Ale ja ŭsio ž dumaju, što dadzieny zakon moža dapamahčy niekatorym baćkam lepš uśviadomić svaju rolu ŭ vychavańni dziaciej. Časta tak zdarajecca, što pa vykliku milicyi pieršymi pryjazdžajuć sacyjalnyja piedahohi, a paśla tolki baćki, a časam byvaje, što zusim nie pryjazdžajuć.
Kali dzieci ŭ haradach znachodziacca pad bolšym nahladam toj ža milicyi, to ŭ vioskach prablema staić kudy bolš vostra. Raskazvaje Nastaśsia, žycharka vioski Raviacičy, Biarozaŭskaha rajonu:
— Kali ja jašče vučyłasia ŭ škole, da nas pryjšła zavuč u kłas i skazała, što nastaŭniki buduć dziažuryć na dyskatekach i paviedamlać baćkam pra tych, chto byŭ dapazna, chto napiŭsia. Tamu, maŭlaŭ, siadzicie doma i nikudy nie chadzicie. Nichto tady nie pasłuchaŭsia. Dziaŭčat zamykali ŭ chatach, nie puskali, a jany vyłazili praz akno i ŭsio adno biehli na tancy. I napivalisia, chto chacieŭ. Za vuhał zachodzili i napivalisia. Ciapier mnie 20 hod i kali ja prychodžu na dyskateku, mnie niama kampanii. Zvyčajna ž chodziać dzieci ad 12 da 16 hod. Da poźniaj nočy tańčać, a jak milicyja zredku pryjedzie, to biahuć-chavajucca.
Na pytańnie, ci dapamohuć vyrašyć prablemu štrafy, jakija buduć davać baćkam, Nastaśsia kaža:
- Usio adno buduć pa načach badziacca. A dyskateka – adzinaja zabava dla viaskovaj moładzi. Kamu patančyć, kamu mordu nabić – ludzi ž roznyja. Nu a baćki naŭrad ci zmohuć dziaciej doma ŭtrymać. Supravadžać ich na dyskateku? Mnie heta padajecca małaimaviernym!
Hadzina «Ch»
Ministerstva adukacyi nieadnaznačna vykazvajecca nakont prapanovy Hienprakuratury. Pa ich mierkavańni, štrafy nie vyrašać pytańnia. Tym bolš, mnohija školniki vučacca ŭ druhuju źmienu, a paśla naviedvajuć repietytaraŭ. Vyjście Minadukacyi bačyć u prafiłaktyčnych razmovach ź dziećmi, jakija pavinny pierš pravodzić baćki i tolki paśla, kali heta spatrebicca, nastaŭniki, sacyjalnyja słužby, milicyja. Heta dapamoža vychavać u dziciaci samakantrol, umieńnie paźbiahać kanfliktnych situacyj.
Ciapier vyrašajecca, u jaki čas pačnuć vartavać niepaŭnaletnich, jakija buduć na vulicy biez baćkoŭ. Načalnik adździełu pa spravach niepaŭnaletnich i moładzi Hienprakuratury Valery Ivanoŭ paviedamlaje:
— Chutčej za ŭsio, dzieci 14-16 hod paśla 21.00 pavinny znachodzicca na vulicy razam z darosłymi, a padletki 16-18 hod zmohuć hulać samastojna da 23.00.
U kancy sakavika prapanovu razhledzić hałoŭny prakuror. Kali jon dać stanoŭčuju adznaku, to prakuratura źviarniecca z zakanadaŭčaj inicyjatyvaj u parłamient. Źmieny buduć uniesienyja ŭ zakon «Ab pravach dziciaci» i Administracyjny kodieks. U kodeksie budzie dakładna prapisana adkaznaść baćkoŭ i pamier štrafu.
