BiełTA
Alaksandr Łukašenka ŭ intervju telekampanii «Mir» zaŭvažyŭ, što nie krytykuje kiraŭnictva inšych krain za miery, jakija tyja prymajuć, bo nie viedaje, jakaja ŭ ich abstanoŭka. Razam z tym dla Biełarusi jon ličyć padobnyja miery zališnimi, paviedamlaje «Źviazda».
«Ale ŭjavi: my Minsk siońnia izalavali i ŭsich zakryli ŭ kvaterach. Jak adreahujuć našy biełarusy? U nas situacyi niama, kab takija miery prymać. I daj Boh, kab hetaj situacyi ŭ nas nie było», — patłumačyŭ jon.
Kiraŭnik dziaržavy ŭpeŭnieny, što zanadta strohija i biazdumnyja miery mohuć pahoršyć situacyju mienavita ŭ baraćbie ź virusami.
«A potym, ty ŭpeŭnieny, što ŭ ciabie niama zaraz karanavirusa? I ja nie ŭpeŭnieny. I ŭjavi, ja ciabie zaraz z tvajoj siamjoj: małaja, žonka, ty, moža, niechta jašče — ja ciabie zakryju ŭ kvatery. A ty nie viedaješ, chvory abo nie. A kali ŭ ciabie imunnaja sistema mocnaja i ty pieranosiš zaraz na nahach…
Ja ŭpeŭnieny, što ŭ nas miljony ludziej užo pierachvareli na virusy, u tym liku na karanavirus. I voś ja ciabie ŭ kvatery zakryŭ — ni vyjści, ni prajści… Hałoŭnaje, jašče propusk treba vypisać, kab vyjści i niekudy schadzić — heta ž da varjactva dajšło, u vajnu takoha nie było, sa śmierciu kali ludzi sutykalisia! Ja ciabie tudy zakryvaju, i ŭ ciabie nazaŭtra ŭ hetaj tuchłaj, dochłaj kvatery, u 25 abo 80 mietrach, pačynaje aktyŭna prajaŭlacca hety karanavirus. Što adbyvajecca? Ty ŭsich zaraziŭ. A kali b ja ciabie nie zakryŭ tudy, ty b na nahach pieranios hety karanavirus. Što, niemahčymy taki scenaryj? Ja viedaju, što heta mahčyma, i niachaj choć adzin urač skaža, što ja nie maju racyju», — sprahnazavaŭ raźvićcio padziej u vypadku karancinu kiraŭnik krainy.
Alaksandr Łukašenka dadaŭ, što ŭvieści takija miery ŭ Minsku — nie prablema, heta mahčyma zrabić ciaham sutak.
«Heta zusim nie pytańnie, ale ŭva što heta vyljecca? Kolki tady budzie śmierciaŭ? Jakaja chutkaja dapamoha spravicca? My budziem tolki vychoplivać z kvater ludziej, jakija buduć ciažkija, i adrazu ich na štučnuju vientylacyju lohkich. I što, my vyratujem hetych ludziej? Viadoma, nie. Tamu nie treba hłupstvam zajmacca»,— reziumavaŭ kiraŭnik dziaržavy.
Arhanizm pavinien zmahacca ź infiekcyjami, dla hetaha, pa słovach biełaruskaha lidara, treba čaściej byvać na śviežym pavietry, a taksama — zajmacca sportam i dobra charčavacca.
«Učora adzin vielmi razumny rasijanin, ja pasłuchaŭ, kaža: treba fizična zmahacca ź im. Ja dumaju, jak ža fizična? Treba siabie zaścierahčy ad niebiaśpieki. Sportam zajmacca treba i na śviežym pavietry być. Treba lohkim dapamahčy.
My, kaža, na dyjecie siadzieli, a patrebna tłustaja ježa. I ja taksama abmiažoŭvaŭ siabie. A masła treba zaraz jeści, akazvajecca, tłušč dapamahaje lohkim zmahacca ź virusami.
Kali śpiecyjalist, vučony kaža, napeŭna, nie durań. Voś ja z vopytu svajho jaho ŭ hetym padtrymlivaju», — dadaŭ Łukašenka.
Biezumoŭna, ludzi buduć chvareć, u tym liku i na karanavirus, i na inšyja niebiaśpiečnyja infiekcyi, jak heta zdaryłasia ŭžo z adnym chvorym, u jakoha akramia novaha virusa vyjavili ekzatyčny niebiaśpiečny hryp.
«U jaho byŭ bukiet. I małajcy ŭračy — voś za što ja ich chvalu zaraz (kab nie pierachvalić) — što jany z kambinacyj lekaŭ roznych znajšli takuju, što zmahła pastavić čałavieka na nohi. Choć jon byŭ u najciažejšym stanie», — raskazaŭ Alaksandr Łukašenka.
«Kazać, što ŭ Biełarusi ŭsio cicha i spakojna — hłupstva poŭnaje. Prosta my nie panikujem, my zajmajemsia kožny svajoj spravaj. My nie vyrašajem praz karanavirus nijakija palityčnyja pytańni, — zajaviŭ jon. — Choć u nas palityčny hod. Viedajecie, kali ščyra, ja by moh siońnia ŭvieści nadzvyčajnaje stanovišča (patruli pa vulicach, usie siadziać) i pakazać, jaki ja kruty chłopiec, pierad prezidenckimi vybarami, što mahu ŭsio ŭziać pad kantrol. Nie daj Boh, kab nam realna pryjšłosia žyć u takoj situacyi, kali daviadziecca abmiažoŭvać čałavieku mahčymaść chadzić pa vulicach, vyvieści svajho… nie sabaku, a dzicia niekudy. Nie daj Boh! I ja ŭ hetyja hulni hulać nie chaču!»
Jon paŭtaryŭ, što my budziem zmahacca ź luboj chvarobaj, tamu jon nie vyłučaje karanavirus.
«Ź luboj chvarobaj treba zmahacca, — akcentavaŭ kiraŭnik dziaržavy. — Bo čałaviečaje žyćcio, kali jano źniknie, nie važna, ad čaho. Jaho prosta nie stanie. Voś u čym pytańnie».
Kiraŭnik dziaržavy paviedamiŭ, što ŭ aŭtorak budzie vynikovaja narada pa šerahu pytańniaŭ, na jakoj budzie abnarodavanaja statystyka.
BiełTA
«My ničoha absalutna nie chavajem. Ni-čo-ha, — raździaliŭ słova pa składach lidar. — Ale hałoŭnaje, što nas vyratavała ad hetaha varjactva (za što nas zaraz krytykujuć) — my na miežach pačali ŭsich čyścić, myć, macać, testavać. Bo ŭbačyli, što hetuju zarazu nam zavoziać zboku. U nas jaje ŭ pryncypie być nie mahło i nie pavinna, jak i ŭ Rasii».
