Nižniaja pałata polskaha parłamienta (Sojm) u paniadziełak pryniała prapanavany kirujučaj partyjaj «Prava i spraviadlivaść» (PiS) prajekt papravak u Vybarčy kodeks, jaki dazvalaje pravieści čarhovyja vybary prezidenta krainy, pryznačanyja na 10 maja, dystancyjna — z dapamohaj pošty, piša tass.ru.
Aŭtary prajekta zajaŭlali, što paštovaje hałasavańnie — nieabchodnaja miera, kab zaścierahčy vybarščykaŭ u pieryjad pandemii. Suprać vystupili nie tolki pradstaŭniki apazicyi, ale i palityčnaje abjadnańnie «Parazumieńnie» vice-premjera Jarasłava Hovina, jakoje ŭvachodzić u kaalicyju ź PiS. Jon prapanavaŭ pieranieści vybary na dva hady, źmianiŭšy Kanstytucyju i padoŭžyŭšy paŭnamoctvy dziejnaha prezidenta Andžeja Dudy ź ciapierašnich piaci da siami hadoŭ. Apazicyja zajaviła, što nie padtrymaje hetuju inicyjatyvu.
Ale z druhoj sproby PiS udałosia ŭnieści prajekt na razhlad Sojmu i zaćvierdzić jaho.
Jak adznačajuć naziralniki, papraŭki ŭ vybarčy kodeks PiS vyrašyła ŭvodzić zanadta pozna. Navat kali Sienat (vierchniaja pałata parłamienta) apieratyŭna ich zaćvierdzić, na padrychtoŭku da dystancyjnaha hałasavańnia ŭ krainie z 30 młn vybarščykaŭ zastaniecca mienš za tydzień.
U Polščy kolkaść vyjaŭlenych vypadkaŭ zaražeńnia karanavirusam dasiahnuła 4 413, 107 čałaviek pamierli, 162 ačuniali. Dla procidziejańnia pašyreńniu infiekcyi ŭłady Polščy ŭviali režym epidemii, začynili miežy dla inšaziemcaŭ i adpraŭlajuć ŭsich, chto ŭjazdžaje ŭ krainu, na 14-dzionny karancin. U krainie začynienyja ŭsie ŭstanovy, za vyklučeńniem praduktovych kram i aptek. Žycharam zabaroniena vychodzić z domu biez krajniaj nieabchodnaści. Usie hramadzianie abaviazany vykonvać sacyjalnuju dystancyju ŭ dva mietry.
10 maja ŭ Polščy pavinien prajści pieršy tur prezidenckich vybaraŭ. Kali nichto z kandydataŭ nie nabiare bolš za 50% hałasoŭ, 24 maja adbudziecca druhi tur z udziełam dvuch kandydataŭ, jakija nabrali najbolš. Z-za pandemii vybarčaja kampanija faktyčna zamarožanaja. Pavodle apytańniaŭ, bolš za 70% žycharoŭ Polščy ličać nieabchodnym pieranieści volevyjaŭleńnie na paźniejšy termin.
