Što stała pryčynaj śmierci 38-hadovaha Alaksieja, zaraz vyśviatlajuć pravaachoŭnyja orhany. Pavodle infarmacyi kaleh, u mužčyny nie adzin dzień trymałasia tempieratura, za apošni čas jon dvojčy byŭ na balničnym, piša Tut.by.
Fota Nadziei Bužan.
— Alaksiej pamior učora. My razmaŭlali ź im litaralna dva dni tamu. Kazaŭ, ničoha nie mianiajecca, palapšeńniaŭ niama, trymajecca tempieratura. Viedajecie, u kiroŭcaŭ chutkaj dapamohi zaraz razmovy na adnu temu — karanavirus. Usie aścierahajucca za svajo zdaroŭje, taksama i Loša bajaŭsia, ale analizy takoha rodu nam robiać tolki ŭ tym vypadku, kali byŭ kantakt z zaražanym. Nakolki mnie viadoma, Alaksieju taki analiz nie rabili, — raspaviadaje Tut.by kiroŭca chutkaj dapamohi, jaki paprasiŭ nie nazyvać jaho danyja ŭ tekście.
Pa słovach mužčyny, Alaksieju było 38 hadoŭ, u jaho nie było nijakich chraničnych zachvorvańniaŭ, jakija mahli b skončycca śmierciu.
— U Lošy apošnija 2,5-3 tydni była tempieratura — 37,5 ci 37,6, to spadała, to znoŭ źjaŭlałasia. Jon byŭ druhi raz na balničnym, kali zakryli pieršy balničny list, praz dni try adkryli novy, — udakładniaje siabar pamierłaha kiroŭcy.
Pavodle jaho słoŭ, uvieś hety čas Alaksiej byŭ doma, nie ŭ špitali. Ź jakim dyjahnazam — jon dakładna nie viedaje.
Jak tłumačyć naš surazmoŭca, kiroŭcy chutkaj dapamohi adnosiacca nie da padstancyi, a da KUP «Minsksanaŭtatrans». Tam paćviardžajuć: Alaksiej, sapraŭdy, byŭ na balničnym.
— Čałaviek pamior, a ad čaho, ja nie viedaju, heta pakaža zaklučeńnie sudova-miedycynskaj ekśpiertyzy, — kamientuje Tut.by dyrektar KUP «Minsksanaŭtatrans» Anatol Dastanka.
U razmovie z Tut.by kiroŭcy chutkaj dapamohi prosiać padniać jašče adnu temu — ich ekipiroŭki.
— Kali nas adpraŭlajuć na vyklik, a tam padazreńnie na karanavirus, lekaraŭ ekipirujuć całkam, nas — nie. «Minsksanaŭtatrans» i padstancyja chutkaj dapamohi — heta dźvie roznyja arhanizacyi. Lekaram na vyklik dajuć procičumnyja kaściumy, reśpiratary, nam ža — zvyčajnuju masku-anuču. My sprabujem uzdymać hetaje pytańnie, pryjazdžała kiraŭnictva, jano starajecca niešta zakupić, ale nie zaŭsiody chapaje kaściumaŭ i kapialušykaŭ. Tamu niekatoryja jeździać u maskach, — kaža adzin z kiroŭcaŭ minskaj padstancyi.
Jaho kaleha dadaje: kali dyjahnaz «karanavirus» paćvierdžany ŭ pacyjenta, to kiroŭcam vydajuć na vyklik abaronu. Kali bryhada jedzie da kantaktu pieršaha ŭzroŭniu — kiroŭcy nadziavajuć masku.
Dyrektar KUP «Minsksanaŭtatrans» Anatol Dastanka hetuju infarmacyju abviarhaje:
— 100% ekipijavanyja. U kiroŭcaŭ usio jość: maski, kaściumy, akulary, bachiły.
Raźvitańnie z Alaksiejem pryznačanaje na piatnicu.
— Pa fakcie śmierci 38-hadovaha mužčyny pravodzicca pravierka Partyzanskim (h. Minska) rajonnym adździełam Śledčaha kamiteta. Dla vyśviatleńnia dakładnaj pryčyny śmierci pryznačana sudova-miedycynskaja ekśpiertyza, pa jaje vynikach budzie pryniata pracesualnaje rašeńnie, — prakamientavała Tut.by Kaciaryna Harlinskaja, aficyjny pradstaŭnik USK pa Minsku.