Pieršym pra špitalizacyju 63-hadovaha ŭładyki Huryja (śvieckaje imia Mikałaj Apalka) napisaŭ Alaksandr Šramko, śviatar, jakoha adchilili ad słužby za krytyku patryjarcha Kiryła. Šramko napisaŭ, što ŭ Huryja karanavirus, a sam archijepiskap znachodzicca ŭ reanimacyi.
Fota gs.by
Pres-sakratar BPC Siarhiej Lepin u kamientary «NN» paćvierdziŭ, što Huryj sapraŭdy ŭ balnicy. Jon adznačyŭ, što nie viedaje pryčynu, a kali b i daviedaŭsia, to nie skazaŭ by z etyčnych pierakanańniaŭ.
Huryj adnačasova źjaŭlajecca rektaram Minskaj duchoŭnaj sieminaryi, jakaja raźmiaščajecca ŭ Žyrovičach u Słonimskim rajonie. Pa internecie hulaje kopija dakumienta za podpisam mitrapalita Paŭła, u jakim adznačajecca, što «ŭ suviazi ź ciažkaj epidemijałahičnaj situacyjaj i špitalizacyjaj archijepiskapa Huryja» vykanaŭcam abaviazkaŭ rektara pryznačajecca protairej Hienadź Łohin.
Va ŭkazie Paŭła havorycca, što Łohin u supracy z sanitarnymi dziaržaŭnymi słužbami i vykładčykami sieminaryi pavinien zabiaśpiečyć dezynfiekcyju ŭsich sieminarskich pamiaškańniaŭ.
Sam Łohin u razmovie z karespandentam «NN» skazaŭ, što «byli čutki» pra špitalizacyju Huryja, ale ničoha dakładna pra heta nie viedaje. «Ja ž zvyčajny viaskovy śviatar», — skazaŭ jon.
«Haziecie Słonimskaj» atrymałasia daznacca, što Huryj sapraŭdy ŭ reanimacyi. Jamu stała kiepska padčas vielikodnaj słužby. U jaho zapaleńnie lohkich i padazreńnie na karanavirus. Vydańnie spasyłajecca na błahačynnaha Słonimskaj akruhi ajca Vadzima.
Huryju 63 hady, jon rodam z Połackaha rajona. Jepiskapam u Navahrudku staŭ u 1996 hodzie. Ličycca adnym z najbolš kansiervatyŭnych ijerejaŭ BPC.
Adnačasova taksama prajšli čutki, što na karanavirus moh zachvareć jepiskap Barysaŭski i Marjinahorski Vienijamin (Vital Tupieka). Maŭlaŭ, jon musiŭ prysutničać na sustrečy viernikaŭ z Alaksandram Łukašenkam u vioscy Małyja Lady Smalavickaha rajona, ale nie byŭ dapuščany paśla pravierki prysutnych na zdaroŭje, napisaŭ Alaksandr Šramko.
Jepiskap Vienijamin. Fota blagobor.by
«Našaj Nivie» ŭdałosia źviazacca z uładykam Vienijaminam. Jon adznačyŭ, što ŭ jaho niama tempieratury. «Vy ž čujecie, što ŭ mianie badziory hołas. Jość lohkaja prastuda, ale nie bolš za toje». Čutki pra karanavirus Vienijamin rašuča abviarhaje. «Ja nie ŭ balnicy, ciapier znachodžusia doma, u manastyry», — adznačyŭ śviatar.
Zaŭvažym, što ŭładyka Vienijamin jakraz i žyvie ŭ manastyry Dabravieščańnia Baharodzicy ŭ Małych Ladach, dzie 19 krasavika na Vialikdzień byŭ Alaksandr Łukašenka.
Jepiskapu Vienijaminu 51 hod, jon rodam z Łuninca. U sakaviku 2010 hoda staŭ jepiskapam Barysaŭskim. Maje reputacyju śviatara pamiarkoŭnaha i malitoŭnaha.
