Čarhovy dziŭny prykład restaŭracyi zaŭvažany ŭ vioscy Čaracianka Homielskaha rajona. Tut u pryhraničnaj zonie staić Uśpienskaja carkva, pabudavanaja ŭ 1865-1868 hadach u psieŭdaruskim styli.
Niadaŭna jaje źniešni vyhlad kardynalna źmianiŭsia: zamiest błakitnych kupałaŭ-cybulin źjavilisia załatyja, fasad pierafarbavali ŭ žoŭty, pastavili płastykavyja vokny.
Tak carkva vyhladała da restaŭracyi. Fota Dźmitryja Iŭčanki, fotobel.by.
A voś jak jaje adnavili. Fota z telehram-kanała «Spadčyna».
Uśpienskaja carkva maje status historyka-kulturnaj kaštoŭnaści, a tamu pravodzić jaje restaŭracyju biez uzhadnieńnia ź Ministerstvam kultury zabaroniena. Ale duchavienstva pačało ramont biez zhody čynoŭnikaŭ.
Na haspadara chrama ijereja Paŭła Charłamava skłali pratakoł ab administracyjnym pravaparušeńni.
Jakoje abličča ŭ vyniku viernuć carkvie, pakul nieviadoma.
«Adbudziecca pasiadžeńnie, śpiecyjalisty pahladziać, jakija parušeńni byli dapuščany. Dakumienty ź pieršapačatkovym vyhladam carkvy budziem zapytvać u archivie jeparchii», — paviedamiła «Našaj Nivie» kiraŭnica adździeła ideałahičnaj raboty, kultury i pa spravach moładzi Homielskaha rajvykankama Aksana Chimakova.
Restaŭracyju pravodzili na hrošy jeparchii i achviaravańni prychadžan. U rajvykankamie adznačajuć, kali ŭ vyniku pryznajuć, što carkvie treba viarnuć jaje pieršapačatkovy vyhlad, pierarablać kupały chram taksama budzie za svoj košt. Biudžetnyja srodki na heta nie vydzialajucca.
