U Dziaržaŭnaj akademičnaj charavoj kapele imia Ryhora Šyrmy zachvareła amal tracina kalektyvu. 23 artysty z 75 majuć karanavirus.
Fota z hrupy kapeły Ukantakcie.
Zamiežnych hastrolaŭ u kapeły apošnim časam nie było. Na karanavirus artystaŭ pačali praviarać tydzień tamu — paśla taho, jak adzin z kaleh va ŭzroście za 60 hod trapiŭ u balnicu i jaho test pakazaŭ stanoŭčy vynik.
«Usie chadzili na pracu, pamiaškańnie adno, mnohija dabirajucca na hramadskim transparcie, — dzielicca adna z supracoŭnic. — Vynikaŭ usich artystaŭ jašče niama, u mnohich źnik niuch. U asnoŭnym usio praciakaje ŭ lohkaj formie».
Amal usie, chto zachvareŭ, znachodziacca ŭ samaizalacyi i lečacca doma. Adnaho artysta ź pnieŭmanijaj u paniadziełak špitalizavali ŭ infiekcyjnuju balnicu.
«Usia kapeła pa damach na dvuchtydniovym karancinie, jak i Fiłarmonija. Štodzień telefanujuć z palikliniki, cikaviacca samaadčuvańniem. Taksama milicyja kantraluje prysutnaść doma praz damafon», — raskazaŭ muž inšaj artystki.
Kiraŭnica charavoj kapeły Volha Janum paćvierdziła, što jaje artysty chvarejuć i ciapier na karancinie.
«Ciažkich vypadkaŭ, na ščaście, niama», — paviedamiła jana. Sama kiraŭnica była adnoj ź pieršych, chto zachvareŭ.
Siaredni ŭzrost artystaŭ u chory — 45 hadoŭ.
U kapele narakajuć: stolki zaražeńniaŭ u ich praz adsutnaść narmalnaha repietytoryja.
«My repietujem, jak sieladcy ŭ bočcy, pra jakuju sacyjalnuju dystancyju možna kazać.
U pryncypie praces śpievu — heta ŭdych i vydych, dziŭna było b, kali b nie zachvareli».
