31 sakavika pravaabaronca Aleh Vołčak padaŭ pazoŭ b abaronie honaru i hodnaści ŭ dačynieńni da haziety «SB — Biełaruś siehodnia» ŭ sud Savieckaha rajona Minska.
A.Vołčak patrabuje abviaržeńnia infarmacyi, pryviedzienaj u artykule pad nazvaj «Mnoho u nas dikovin, každyj čudak — Bietchovien» u numary «SB» za 6 sakavika 2009 hoda.
Artykuł napisany ŭ formie fieljetona i raspaviadaje pra biełaruskich pravaabaroncaŭ. Aprača Vołčaka ŭ im fihuruje pravaabaronca z Salihorska Jana Palakova, jakaja skončyła žyćcio samahubstvam u noč na 7 sakavika.
U materyjale, u pryvatnaści, apisany incydent, jaki adbyŭsia z A.Vołčakam vosieńniu 2003 hoda.«Udzielnik drobiaznaj prydarožnaj vałtuźni — nie padzialiŭ parkovačnaje miesca! — pravaabaronca Aleh Vołčak ruchava abbiehaŭ redakcyi minskich haziet z horkaj skarhaj, što na jaho, siarod biełaha dnia, na skryžavańni (!), napali supracoŭniki śpiecsłužbaŭ (!!), uzbrojenyja kastetami (!!!), i što heta była, biez sumnieńnia, pomsta za jaho vielmi pravaabarončuju dziejnaść (!!!!)», — śćviardžaje aŭtar artykuła Ksienafont Supierfasfataŭ.
«Sapraŭdy, — paćviardžaje Vołčak, — 24 vieraśnia 2003 hoda nieviadomy mnie hramadzianin u adkaz na maje zaŭvahi ab tym, što jon stvaryŭ avaryjnuju situacyju, prymusiŭšy mianie vyjechać na sustrečnuju pałasu, nanios mnie dva metanakiravanyja ŭdary ŭ tvar. U ruce hramadzianina byŭ mietaličny pradmiet. Ad druhoha ŭdaru ja ŭchiliŭsia. Toj, chto napadaŭ, parvaŭ mnie pinžak i pakinuŭ miesca złačynstva. Ja vyklikaŭ milicyju i chutkuju dapamohu i źviarnuŭsia va UUS Savieckaha rajona Minska z zajavaj ab pryciahnieńni da adkaznaści vinavataha».
Pry hetym A.Vołčak padkreślivaje, što ŭ jaho zajavie ab raspačynańni kryminalnaj spravy nie było ni słova pra toje, što abvinavačany źjaŭlajecca supracoŭnikam śpiecsłužbaŭ i što jaho dziejańni — pomsta za pravaabarončuju dziejnaść.
«Takim čynam, pa vinie adkazčyka było nie tolki dapuščana skažeńnie faktaŭ, heta było zroblena ŭ źnievažalnaj dla mianie formie», — ličyć pravaabaronca.
A.Vołčak patrabuje abviaržeńnia apublikavanych u haziecie źviestak i spahnańnia z redakcyi haziety «SB — Biełaruś siehodnia» hrašovaj kampiensacyi za maralny ŭron u 70 młn. rubloŭ.
Pry hetym, zaznačaje iściec, u redakcyi jamu zajavili, što Ksienafont Supierfasfataŭ u štacie haziety nie pracuje. «Niama takoha čałavieka i siarod pazaštatnych supracoŭnikaŭ haziety, z čaho ja dapuskaju, što heta psieŭdanim kahości sa štatnych supracoŭnikaŭ haziety», — ličyć Vołčak.
