JUNISIEF źviarnuŭsia da biełaruskaha biznesu i žycharoŭ krainy z zaklikam sabrać $1,5 miljona na dapamohu miedykam. Pa ich acenkach, hetaj sumy chopić na 4 miesiacy bieśpierapynnaj pracy biełaruskich balnic.
JUNISIEF płanuje zakupić 1,5 miljona litraŭ antysieptyku, hihijeničnyja nabory, srodki indyvidualnaj abarony, bolš za 100 tysiač test-sistem, prybory dystancyjnaha vymiareńnie tempieratury, kisłarodnyja kancentratary.
«Naša Niva» pacikaviłasia ŭ vałancioraŭ, jakija dapamahajuć balnicam, što ciapier najbolš patrebna daktaram. Niaŭžo ŭ nas nie chapaje antysieptyku?
Fota Nadziei Bužan
Michaił Mackievič kuryruje vałancioraŭ u Stoŭbcach. Jany sprabujuć zabiaśpiečyć patreby chutkaj dapamohi, rajonnaj balnicy i sanepidemstancyi. Kaža, što jakraz taki antysieptyk jość. Z marlevymi paviazkami pytańnie taksama vyrašana. Najbolšaja prablema — z reśpiratarami.
«U miedykaŭ na chutkaj jość tolki tyja reśpiratary, što my im pieradali. Jany ich nosiać pa 12 hadzin, choć reśpiratary raźličany na 8, a potym časam jašče i dezynfiekujuć, kab vykarystać znoŭ», — zaŭvažaje jon.
Nie chapaje taksama supraćčumnych kaściumaŭ i akularaŭ ź mikravientylacyjaj. Dachodzić da taho, što daktary vykarystoŭvajuć akulary dla dajvinhu: adrazajuć trubku i ŭstaŭlajuć filtrujučy elemient. Kaściumy možna dastać u biełaruskich pradpryjemstvaŭ.
«Ich šyjuć sa spanbondu, sielskahaspadarčaha materyjału. U Žodzina, Bierazino niadrennyja robiać. Ale miedykaŭ imi nie zabiaśpiečyli. Bačyŭ abjavu, što ŭ niejkim haradku daktary naohuł daždžaviki prasili zakupić, kab było choć štości», — kaža Michaił Mackievič.
Nieabchodnyja srodki abarony vałanciory šukajuć praź internet, praz toj ža «Kufar». Tamu pytańnie, jak vyjści na pastaŭščykoŭ, sapraŭdy jość. U hetym dapamoha nie budzie lišniaj.
«Ale jość dva važnyja pytańni. Pieršaje — jak jany buduć daviedvacca pra patreby? U Minzdaroŭja? Tam ža kažuć, što srodkaŭ indyvidualnaj abarony chapaje. A druhoje — pytańnie raźmierkavańnia. Cikava, na asnovie jakich danych buduć vystaŭlać pryjarytety».
Aktyvist Andrej Stryžak — adzin z suzasnavalnikaŭ vałanciorskaj kampanii Bycovid-19. Heta inicyjatyva pracuje ŭ mnohich rehijonach i sabrała ŭ dapamohu biełaruskim miedykam bolš za $200 tysiač. Jon taksama adznačaje, što antysieptyk možna nabyć i ŭ nas — jaho raźlivajuć na Babrujskim zavodzie bijatechnałohij, jość i niekalki pryvatnych pradpryjemstvaŭ. Adnarazovyja chirurhičnyja maski taksama jość u Biełarusi.
Z taho, što važna pryvieźci ŭ balnicy z-za miažy, — pulsaksimietry, dystancyjnyja termomietry, kisłarodnyja kancentraty. I reśpiratary.
«U nas niama ich vytvorčaści ŭ toj kolkaści, u jakoj nieabchodna. U balnicy ŭžo pastavili bolš za miljon reśpirataraŭ, bolšaść ź jakich typu fpp-2. A jany, naprykład, nieprydatnyja dla pracy ŭ aerazolnym asiarodku — u adzialeńniach, dzie miedyki sutykajucca ź bijałahičnymi vadkaściami pacyjenta (u tym ža chirurhičnym)», — źviartaje ŭvahu Andrej Stryžak.
Najbolšaja patreba ŭ srodkach abarony ŭ rehijonach, dzie najbolš vypadkaŭ karanavirusa — u Minsku i Viciebsku, kaža aktyvist.
Ich inicyjatyva, darečy, budzie supracoŭničać ź JUNISIEF. Aproč pramych adhruzak na składy Minzdaroŭja, mižnarodny fond pieradaść vałancioram častku srodkaŭ abarony i miedabstalavańnia.
«My majem zajaŭki ad daktaroŭ pa ŭsioj krainie, łahistyčnyja mahčymaści, a ŭ JUNISIEF jość mahčymaść znajści pastaŭščykoŭ. Tamu ja ŭściešany ich krokam», — kaža Andrej Stryžak.
Nie tolki antysieptyk. JUNISIEF ahučyŭ poŭny śpis taho, što płanuje zakupić na $1,5 miljona, jaki źbiraje ŭ biełarusaŭ
