Napačatku pandemii karanavirusa jeŭrapiejskija ŭrady nie vielmi achvotna išli na abmiežavańni ekanamičnaj aktyŭnaści i admienu masavych mierapryjemstvaŭ.
Tak, u Ispanii 8 sakavika, u Mižnarodny žanočy dzień, prajšli tradycyjnyja statysiačnyja maršy suprać hiendarnaj niaroŭnaści. Krainaj kiruje kaalicyja sacyjalistaŭ i levych radykałaŭ, tamu ŭrad nie staŭ zaminać praviadzieńniu akcyi svaich prychilnikaŭ, a ministr achovy zdaroŭja Salvado Iła tolki paprasiŭ nie iści na demanstracyju ludziej ź simptomami zachvorvańnia.
Padčas demanstracyi adzin z udzielnikaŭ nies płakat z nadpisam: «Mačyzm zabivaje bolš, čym karanavirus» («Mačyzm» — heta pakaznaja, padkreślenaja mužčynskaść, fieministki abaznačajuć hetym słovam «mužčynski šavinizm i prahu da daminavańnia» — NN).
Siarod vysokapastaŭlenych udzielnikaŭ maršu byli namieśnica premjer-ministra Karmien Kalva, ministr pa pytańniach roŭnaści Iren Mantera i žonka premjer-ministra Piedra Sančesa Biehońja Homies. Usie troje paźniej atrymali pazityŭny vynik testa na karanavirus.
Jašče try ispanskija deputaty zarazilisia paralelna na partyjnym mitynhu ŭltrapravaj partyi Vox.
Na karanavirus naohuł zachvareła asabliva šmat byłych i dziejnych ispanskich palitykaŭ i dziaržsłužboŭcaŭ, adznačaje El Pais.
Zapavolenaja reakcyja, bojaź zabaranić naviedvańnie futbolnych matčaŭ i masavyja mierapryjemstvy stali padstavaj lidarstva Ispanii ŭ mižnarodnaj karanavirusnaj statystycy.
Dla paraŭnańnia, inšaja situacyja nazirajecca ŭ susiedniaj Partuhalii: hetaja 10-miljonnaja kraina zabaraniła ŭsie publičnyja mierapryjemstvy na rańnich stadyjach pandemii.
Situacyja z zachvorvańniami davoli spryjalnaja, niahledziačy na adsutnaść vielmi strohaha karancinu. Prynamsi, fabryki i budoŭli ŭ krainie mohuć zastavacca adkrytymi. Važnym momantam Partuhalii stała taksama karanavirusnaje pieramirje va ŭnutranaj palitycy, na jakoje ŭ Madrydzie «hladziać z zajzdraściu i adkrytym rotam», adznačaje Politico.
Pradaŭcy ŭ supiermarkiecie Mataro, Katałonija, pracujuć u abarončych kaściumach. Fota Daniel Ferrer Paez, Shutterstock.com
Zmročnym simvałam ispanskaha pravału stała pieraprafilavańnie budynka vystavačnaha centra ŭ Madrydzie pad palavy špital, a susiedniaha Ladovaha pałaca — pad časovy morh. Kab strymać epidemiju, ułady Ispanii byli ŭ vyniku vymušanyja ŭ druhoj pałovie sakavika ŭvieści prosta drakonaŭskija karancinnyja miery. U krainie paŭtara miesiaca dzieciam było zabaroniena vychodzić z kvater. Była spynienaja ŭsia nieabaviazkovaja ekanamičnaja aktyŭnaść — nie tolki śfiera pasłuh, ale navat budaŭnictva i pramysłovaść, jakija nie adnosilisia da charčovaha i farmaceŭtyčnaha łancužkoŭ. Tym nie mienš, kolkaść achviar karanavirusa ŭ krainie pieravysiła 25 tysiač čałaviek. Ispanii spatrebilisia dva miesiacy, kab adnosna stabilizavać razhajdanuju situacyju i pačać adkryvać krainu.
