Błohiery Alaksandr Kabanaŭ i Siarhiej Piatruchin ciapier znachodziacca ŭ Bresckaj centralnaj haradskoj balnicy. Alaksandr Kabanaŭ trapiŭ tudy 9 maja paśla taho, jak sam vyklikaŭ chutkuju dapamohu z-za drennaha samaadčuvańnia, paviedamlaje BAŽ.
Alaksandr Kabanaŭ i Siarhiej Piatruchin. Archiŭnaje fota dw.com
Siońnia ŭ druhoj pałovie dnia lekary paviedamili Alaksandru Kabanavu pra stanoŭčy test na COVID-19. Błohier taksama kaža, što jamu dyjahnastavali pravabakovuju pnieŭmaniju, a siarod simptomaŭ — padvyšanaja tempieratura (37,5-37,7) i adčuvańnie, što źnikaje pačućcio smaku.
Alaksandr Kabanaŭ raspavioŭ, što tempieratura ŭ jaho trymajecca ŭžo kala troch tydniaŭ: jašče z taho času, kali jon znachodziŭsia ŭ Pinskim rajonie. Pa słovach błohiera, u rodnym Biarozaŭskim rajonie jon nie byŭ užo niekalki miesiacaŭ.
U balnicy Alaksandr Kabanaŭ padpisaŭ papieru pra praviły rasparadku, dzie abaviazaŭsia nie vychodzić z pałaty. Tut jon znachodzicca adzin: u pałacie jość chaładzilnik, televizar, rukamyjnica. Ježu pacyjentam prynosiać, a lekary prychodziać u supraćvirusnaj ekipiroŭcy.
Błohier vykazaŭ svajo mierkavańnie nakont taho, jak dziejničajuć ułady va ŭmovach pandemii:
«Šmat jakija zachady zaraz rabić užo pozna. U pieršuju čarhu ŭłady pavinny byli infarmavać nasielnictva, papiaredzić pra toje, što nas čakaje. A kali infarmacyi niama, usio vyhladaje pa-inšamu. Zaŭsiody tak było — kali niešta chavajuć, značyć usio nie tak užo i dobra», — havoryć Alaksandr Kabanaŭ.
U Bresckaj centralnaj haradskoj balnicy, ale na inšym paviersie, ciapier znachodzicca i kaleha Alaksandra Kabanava — błohier Siarhiej Piatruchin. U jaho taksama padvyšanaja tempieratura. U balnicu Siarhiej Piatruchin trapiŭ paśla suda, jaki adbyŭsia ŭčora. Nahadajem, sudździa Dźmitryj Kuroŭski pryniaŭ rašeńnie aryštavać błohiera na 15 sutak.
Spačatku milicyjanty pavieźli Siarhieja Piatruchina z suda ŭ izalatar, navat nie dačakaŭšysia vyklikanaj chutkaj dapamohi. U vyniku błohier byŭ špitlizavany ŭ druhoj pałovie dnia 11 maja.
Alaksandr Kabanaŭ nie vyklučaje, što paśla vypiski z balnicy jaho taksama čakaje sud. Błohier raspavioŭ, što niekatory čas kala jaho pałaty znachodzilisia supracoŭniki milicyi. Z čym heta źviazana, Alaksandr Kabanaŭ nie viedaje, a lekary jamu ničoha nie tłumačać na hety kont.
