Delfi
Urad Litvy abmiarkoŭvaje jašče adzin etap źmiakčeńnia umoŭ karancinu. Ministr achovy zdaroŭja Litvy Aŭrelijus Viaryha pradstaviŭ na pasiadžeńni jašče šerah praviłaŭ, piša Delfi.lt.
Z 14 maja možna źbiracca hrupami da 5 čałaviek (da hetaha pa 2), adnak pa-raniejšamu treba vykonvać dystancyju ŭ 2 m i kantakt nie daŭžej za 15 chvilin.
Z 14 maja taksama źmianiajecca paradak našeńnia masak. Pa-raniejšamu asoby, starejšyja za 6 hadoŭ, u zakrytych pamiaškańniach pavinny być u maskach (za vyklučeńniem kafe padčas pryniaćcia ježy i spartzały) i ŭ niekatorych hramadskich miescach: na rynkach i ŭ inšych miescach handlu, padčas mierapryjemstvaŭ, na ekskursijach, na prypynkach hramadskaha transpartu. U astatnich vypadkach maski nadziavać tolki rekamiendujuć.
Z 15 maja pašyrajecca koła zamiežnikaŭ, jakija mohuć pryjazdžać u Litvu. U Litvu zmohuć pryjazdžać hramadzianie Polščy i inšyja zakonnyja žychary hetaj krainy, kali jany pryjazdžajuć pa pracy ci vučobie (im nie treba vykonvać 14-dzionnuju izalacyju). Dazvolać ŭjezd nie tolki hramadzian Łatvii i Estonii, ale i inšych ludziej, jakija pražyvajuć na terytoryi hetych krain na zakonnaj padstavie (im nie treba vykonvać 14-dzionnuju izalacyju pry ŭmovie, što pierad pryjezdam u Litvu jany na praciahu dvuch tydniaŭ nie vyjazdžali za miežy Łatvii i Estonii).
Z 30 maja adkryjucca centry azdaraŭlenčych pasłuh.
Z 18 maja restarany i kafe zmohuć prymać naviedvalnikaŭ nie tolki na vulicy, ale i ŭ pamiaškańni. Adkryjucca taksama kłuby, načnyja bary i inšyja zabaŭlalnyja miescy, tolki abmiažujuć čas ich pracy z 8 da 22:00.
Z 18 maja zmohuć pracavać kazino i hulniavyja sałony, zdymajecca abmiežavańnie na pradastaŭleńnie pasłuh achovy zdaroŭja.
Z 18 maja adkryvajecca dziciačyja sady i padrychtoŭčyja kłasy.
Z 25 maja — škoły na ŭłasnaje žadańnie mohuć prymać dziaciej pačatkovaj škoły, pravodzić kansultacyi dla vučniaŭ 12 kłasaŭ, mohuć adkrycca škoły dla dziaciej sa śpiecpatrebami. Kali škoła vyrašyć nie prymać dziaciej, praces navučańnia pavinien praciahvacca dystancyjna.
***
Litva ŭviała strohi karancin u siaredzinie sakavika. Za ŭvieś čas u krainie zafiksavana 1505 vypadkaŭ karanavirusa (u Biełarusi 25 825), abo 553 na 1 młn čałaviek (u Biełarusi 2733). Pamierli 54 čałavieki (u Biełarusi 146).
Učora i pazaŭčora ŭ Litvie było pa 6 novych vypadkaŭ karanavirusa. U Biełarusi 967 i 952 adpaviedna.
