Vyniesieny vyrak u sudzie nad palitviaźniem Pilipam Šaŭrovym, jaki častkova pryznaŭ svaju vinu ŭ farbavańni ŭ čyrvony koler ruk pomnika Puškinu ŭ Minsku, piša «Radyjo Svaboda».
19 maja sud Centralnaha rajona Minska ahučyŭ vyrak Pilipu Šaŭrovu: jaho pryznali vinavatym u chulihanstvie i ŭ paškodžańni majomaści dy aštrafavali na 50 bazavych vieličyniaŭ (1350 rubloŭ).
Prakuror Marharyta Kuryłovič tak i prasiła pakarać Šaŭrova.
Pilipa Šaŭrova pryznali vinavatym u chulihanstvie pavodle 1 i 2 častak 339 artykuła Kryminalnaha kodeksa. Jamu pahražaje da 6 hadoŭ źniavoleńnia. Pilipa Šaŭrova trymali pad vartaj z 19 studzienia pa 6 maja. Pavodle dziaržaŭnaha abvinavaŭcy, toje, što Pilip Šaŭroŭ učyniŭ «złačynstva suprać hramadskaj marali», u sudzie było całkam dakazana.
U apošnim słovie Šaŭroŭ paprasiŭ prabačeńnia ŭ tych, kaho jahonyja dziejańni mahli abrazić, paabiacaŭ tak bolš nie rabić i znajści pracu.
Što zdaryłasia
17 studzienia stała viadoma, što niechta pafarbavaŭ čyrvonaj farbaj ruki pomnika Alaksandru Puškinu kala hatela «Biełaruś» u Minsku. Ambasada Rasii vystupiła z admysłovaj zajavaj, a Śledčy kamitet Biełarusi zavioŭ kryminalnuju spravu ab paškodžańni pomnika. U pieršaj pałovie dnia 20 studzienia stała viadoma, što ŭ naniasieńni farby na pomnik Puškinu pryznaŭsia aktyvist «Maładoha fronta» Pilip Šaŭroŭ, jaki 19 studzienia sam pryjšoŭ u milicyju.
Šaŭrova vinavaciać taksama ŭ tym, što jon namalavaŭ bieł-čyrvona-bieły ściah na pamiatnym znaku zahinułym supracoŭnikam Ministerstva ŭnutranych spravaŭ u Minsku, napisaŭ «1937» na aharodžy pompavaj stancyi ŭ Baraŭlanach.
Paśla epizodu z pomnikam Puškinu ambasada Rasii vystupiła z admysłovaj zajavaj, a Śledčy kamitet Biełarusi zavioŭ kryminalnuju spravu ab paškodžańni pomnika.
Šaŭroŭ pryznaje vinu tolki častkova. Škodu ad jahonych dziejańniaŭ acanili ŭ 228 rubloŭ 66 kapiejek.
Šaŭroŭ pryznaŭ vinu častkova
Pilip Šaŭroŭ častkova pryznaje vinu. Aktyvist paćvierdziŭ u sudzie, što heta jon 17 studzienia pafarbavaŭ ruki pomniku Puškinu, a taksama namalavaŭ bieł-čyrvona-bieły ściah na pomniku supracoŭnikam MUS kala Śvisłačy, a nastupnym dniom zrabiŭ nadpis «1937» na aharodžy pompavaj stancyi vodazaboru blizu Kurapat.
Ale Pilip Šaŭroŭ zajaŭlaŭ, što zrabiŭ heta nie z chulihanskich namieraŭ, jak ličyć śledstva, a vyklučna z palityčnych pryčyn. Pavodle Šaŭrova, rasfarboŭvajučy pomnik Puškinu, jon pratestavaŭ suprać zamiežnaj palityki Rasii, jakaja imkniecca pahłynuć Biełaruś.
Naniasieńnie bieł-čyrvona-biełaha ściaha na pomnik zahinułym supracoŭnikam MUS i ŭnutranych spraŭ Šaŭroŭ patłumačyŭ namieram nahadać dziejnym milicyjantam, što jany musiać abaraniać niezaležnaść Biełarusi. Nadpis «1937» niepadalok ad Kurapataŭ, pavodle Pilipa Šaŭrova, heta «napamin pra najbolš žachlivy hod palityčnych represij u SSSR».
«Heta nadumanyja pryčyny»
U sudovych sprečkach palityčnyja pryčyny ŭčynkaŭ Pilipa Šaŭrova pradstaŭnica prakuratury Marharyta Kuryłovič nazvała nadumanymi i nastojvała na chulihanskich namierach padsudnaha. Na dumku dziaržaŭnaha abvinavaŭcy, Pilip Šaŭroŭ dziejničaŭ «demanstracyjna, źnievažajučy maralnyja kaštoŭnaści hramadstva».
«Alaksandar Puškin źjaŭlajecca viadomym dziejačam litaratury, tvory jakoha vyvučajuć u Biełarusi», — kazała Marharyta Kuryłovič. Pavodle jaje, «aktam vandalizmu» jość i malavańnie bieł-čyrvonaha-biełaha ściaha na pomniku zahinułym milicyjantam.
Čamu pierakvalifikavali adkaznaść u epizodzie pra nadpis «1937»?
U sprečkach pradstaŭnica prakuratury admoviłasia ad abvinavačańnia Pilipa Šaŭrova ŭ chulihanstvie ŭ trecim epizodzie spravy — pra nadpis «1937» na aharodžy pompavaj stancyi na vulicy Sasnovy Bor. Dziaržaŭny abvinavaŭca pryznała, što aharodža — heta nie pomnik, i tamu dziejańni aktyvista varta ličyć nie chulihanstvam, a tolki paškodžańniem majomaści, a značyć, ich možna kvalifikavać ich pavodle 341-ha artykuła Kryminalnaha kodeksa.
Advakat Šaŭrova Jaŭhien Masłaŭ nahadaŭ u sprečkach, što pra hety epizod (ab nadpisie «1937») pravaachoŭnym orhanam uvohule nie było viadoma da jaŭki Šaŭrova z pavinnaj. Pavodle abaroncy, Pilip Šaŭroŭ nie nanios nijakaj škody pomniku Puškinu i memaryjalnamu znaku na vulicy Kamunistyčnaj dy całkam kampiensavaŭ straty kamunalnikaŭ na ačystku pomnikaŭ ad farby. Abaronca prasiŭ apraŭdać Pilipa Šaŭrova, bo ličyć, što ŭ jahonych dziejańniach nie było składu kryminalnaha złačynstva.