Padčas pasiadžeńnia Centrvybarkama Lidzija Jarmošyna paskardziłasia na pavodziny adnoj z pretendentak na pasadu prezidenta. Maŭlaŭ, taja chvareje na karanavirus i sprabavała zarazić rabotnikaŭ CVK.
«U składzie hrupy (prychilnikaŭ Statkieviča — «NN») byŭ čałaviek, u jakoha stanoŭčy test na karanavirus. I joj pra heta viadoma! Jana niekalki razoŭ pryjazdžała siudy. Bolš za toje, jana patrabavała asablivyja ŭmovy, kab u jaje dakumienty prymali ŭ kabiniecie. Napeŭna, chaciełasia plunuć u maju pryjomnuju, kab užo zarazić nazaŭždy. Kali jaje ŭsio ž taki zmahli izalavać i pasadzić na karancin, vy viedajecie, kaho jana nazvała kantaktam pieršaha ŭzroŭniu? Čałavieka, jaki prymaŭ u jaje dakumienty, našaha hałoŭnaha jurysta Halinu Vasiljeŭnu (Halina Mkrtčan — «NN»). Dla taho kab prosta vyvieści z pracazdolnaha stanu ŭvieś aparat. Voś mietady pracy hetaj hrupy!» — aburyłasia Jarmošyna.
Najchutčej, havorka viadziecca pra pretendentku Alenu Davydavu. Heta prychilnica Mikoły Statkieviča — pradstaŭnica ruchu «žyvych ludziej». Jana i jaje paplečniki ličać siabie hramadzianami BSSR i davodziać, što Saviecki Sajuz nie raspaŭsia.
Alena Davydava, fota «Biełsata»
Pry rehistracyi dakumientaŭ u CVK Davydava paznačyła siabie jak epidemijołaha Homielskaha abłasnoha centra hihijeny, epidemijałohii i hramadskaha zdaroŭja, a taksama fielčara homielskaj chutkaj dapamohi.
Historyja z «chvarobaj» dziŭnaja. Načalstva patłumačyła Davydavaj, što jana pavinna samaizalavacca jak kantakt pieršaha ŭzroŭniu. Maŭlaŭ, bryhada, u jakuju jana ŭvachodziła, kantaktavała z chvorym na karanavirus. Sama Davydava miarkuje, što na jaje akazvajecca palityčny cisk. Ad kamientaroŭ «Našaj Nivie» Davydava admoviłasia.