Fota Nadziei Bužan
Ministr achovy zdaroŭja Uładzimir Karanik padrabiazna prakamienciravaŭ situacyju z vypłatami miedrabotnikam nadbavak za rabotu z pacyjentami va ŭmovach karanavirusa. Adpaviednyja zajavy jon zrabiŭ siońnia, adkazvajučy na pytańnie BIEŁTA.
Ministr u pryvatnaści adkazaŭ na pytańnie nakont infarmacyi, jakaja źjaviłasia ŭ šerahu resursaŭ, što nibyta dapłatu miedykam buduć vyličvać pachvilinna.
«Nie vyklučana, što jany pierabłytali ź miedycynskimi rabotnikami niejkaj inšaj krainy. My ŭžo nie raz davali hetyja rastłumačeńni i ja, naviedvajučy miedustanovy, čyrvonyja zony, śpiecyjalna rabotnikaŭ pytaju, ci atrymali jany nadbaŭki ŭ tym vyhladzie, jak heta praduhledžana ŭkazam.
Pačynajučy z sanitarki i zakančvajučy zahadčykam adździaleńnia, jašče nichto nie skazaŭ, što zapłacili mienš, čym treba ŭ adpaviednaści z ukazam», — skazaŭ ministr.
«Asnoŭnaje pytańnie, napeŭna, datyčycca piersanału chutkaj miedycynskaj dapamohi abo dyjahnastyčnych słužbaŭ, jakija pa abaviazku słužby zajmajucca ci transparciroŭkaj pacyjentaŭ z karanavirusnaj infiekcyjaj, ci abśledavańniem, funkcyjanalnaj, renthienałahičnaj dyjahnostykaj. I tut my jašče raz havorym ab tym, što kali na praciahu źmieny miedycynski piersanał kantaktavaŭ z pacyjentam z karanavirusnaj infiekcyjaj, to apłata idzie za ŭsiu źmienu. Heta značyć, nie za tyja chviliny, paŭhadziny abo hadzinu, pakul jany zajmalisia akazańniem miedycynskaj dapamohi.
Kali takich źmien na praciahu miesiaca było bolš za 30 pracentaŭ, apłata idzie za ŭvieś miesiac — heta značyć poŭnaja apłata», — padkreśliŭ Uładzimir Karanik.
Pavodle jaho słoŭ, tut bačycca sacyjalnaja spraviadlivaść: «Tyja, chto sapraŭdy dziesiać dziažurstvaŭ pastajanna zajmaŭsia akazańniem miedycynskaj dapamohi pacyjentam z karanavirusnaj infiekcyjaj i chto na adnym dziažurstvie ažyćciaviŭ pieravozku pacyjenta… Pa-mojmu, niespraviadliva, što jany atrymajuć absalutna adnolkavyja dapłaty. Tut my vykonvajem pryncyp sacyjalnaj spraviadlivaści i stroha prytrymlivajemsia ŭkaza prezidenta. Usie, chto kantaktavaŭ z hetymi pacyjentami, atrymajuć dapłatu. Minimalna — heta źmiena. Maksimalna — za poŭny miesiac raboty».
Uładzimir Karanik taksama rastłumačyŭ situacyju, što robiać, kali pieršapačatkova niezrazumieła, ci byŭ inficyravany karanavirusam pacyjent, jakomu akazvałasia dapamoha.
«Byvaje, my viaziom prosta ź pnieŭmanijaj i nie viedajem, što ŭ pacyjenta jość karanavirus. U kancy miesiaca chutkaja dapamoha padaje śpisy tych pacyjentaŭ, da jakich jany vyjazdžali na vyklik abo ažyćciaŭlali transparciroŭku. Akramia taho, sanitarnyja słužby razam ź lačebnikami paraŭnoŭvajuć heta sa śpisami ludziej z zarehistravanaj karanavirusnaj infiekcyjaj.
I kali, naprykład, 29-ha čysła miesiaca chutkaja dapamoha pieravoziła pacyjenta z umoŭna «čystaj» pnieŭmanijaj, a 2-ha čysła (nastupnaha miesiaca) analiz paćvierdziŭ najaŭnaść u pacyjenta karanavirusnaj infiekcyi, adpaviedna, dapłata pieraličvajecca i vypłačvajecca dadatkova ŭ nastupnym miesiacy».
«Usie vypadki akazańnia miedycynskaj dapamohi pacyjentam nazvanaha profilu buduć vyjaŭleny i apłačany», — zapeŭniŭ ministr.
Uładzimir Karanik źviarnuŭ uvahu na toje, što kali jość pierakosy na miescach, to na hety vypadak sumiesna z halinovym prafsajuzam Ministerstvam achovy zdaroŭja stvorana haračaja linija ŭ kožnym rehijonie. «U nas heta situacyja znachodzicca na kantroli Ministerstva achovy zdaroŭja. Kali niechta ličyć, što jaho pravy ŭščemleny, jon moža źviarnucca abo ŭ prafsajuz, abo da administracyi svajoj ustanovy, abo va ŭpraŭleńnie achovy zdaroŭja vobłaści, abo niepasredna ŭ Ministerstva achovy zdaroŭja. Heta ŭvažliva budzie vyvučana. Albo buduć dadzieny rastłumačeńni, albo budzie ažyćcioŭlena dapłata», — skazaŭ jon.
Ministr u pryvatnaści pryvioŭ danyja adnosna stancyi chutkaj miedycynskaj dapamohi ŭ Babrujsku, dzie situacyja z nadbaŭkami miedykam aśviatlałasia ŭ šerahu ŚMI: «Z 290 rabotnikaŭ, uklučajučy kiroŭcaŭ, fielčaraŭ, daktaroŭ, dapłaty za krasavik atrymali 118 čałaviek — tyja, chto sapraŭdy akazvaŭ dapamohu pacyjentam z karanavirusnaj infiekcyjaj. Tam parušeńniaŭ u dapłatach vyjaŭlena nie było».
Kali ž buduć vyjaŭlacca tyja ci inšyja parušeńni, to jany buduć razhledžany. «Dla hetaha jość ustanoŭleny zakonam arbitraž i miechanizm atrymańnia dapłat. I ŭ hety miechanizm srodki masavaj infarmacyi nie ŭvachodziać, — dadaŭ Uładzimir Karanik. — Kali pravy miedycynskich rabotnikaŭ parušany, jany buduć adnoŭleny».
