Siarhiej Čeračeń idzie na 4-m miescy, fota Nadziei Bužan
Nie ŭsie 15 zarehistravanych inicyjatyŭnych hrup ŭklučylisia ŭ praces pa zbory podpisaŭ u pieršy ž dzień. Naprykład, u hrupu Viktara Babaryki ŭvajšło bolš za 9 tysiač čałaviek, i niekalki dzion pajšło na toje, kab tolki razdać im padpisnyja listy. Takaja situacyja była ŭ mnohich, tamu zbor podpisaŭ inicyjatyŭnyja hrupy pačali ŭ roznyja dni, piša Tut.by.
Na 28 maja vyniki takija:
Alaksandr Łukašenka — bolš za 200 tysiač podpisaŭ;
Viktar Babaryka — 50 tysiač podpisaŭ;
Natalla Kisiel — 37 840 podpisaŭ;
Siarhiej Čeračeń - 21 250 podpisaŭ;
Valeryj Capkała — amal 20 tysiač podpisaŭ;
Andrej Dźmitryjeŭ — 16 tysiač podpisaŭ;
Hanna Kanapackaja — bolš za 10 tysiač podpisaŭ.
Deputat Aleh Hajdukievič da taho, jak zajavić, što zdymajecca z vybaraŭ, śćviardžaŭ, što paśpieŭ sabrać za svajo vyłučeńnie 30 tysiač podpisaŭ. Jon adznačyŭ, što pieradaść ich u štab Alaksandra Łukašenki, ale heta niemahčyma: zakon nie praduhledžvaje pieradaču podpisaŭ za adnaho patencyjnaha kandydata inšamu.
Pradstaŭniki apazicyi Juryj Hubarevič, Volha Kavalkova, Mikałaj Kazłoŭ, Uładzimir Niapomniaščych podpisy za svajo vyłučeńnie źbirać nie płanavali pieršapačatkova. Jany zarehistravali svaje inicyjatyŭnyja hrupy, kab vychodzić na dazvolenyja zakonam pikiety i mieć znosiny ź ludźmi.
Prykładna takaja ž situacyja sa Śviatłanaj Cichanoŭskaj. Jak paviedamlaŭ Tielehram-kanał «Kraina dla žyćcia», u Baranavičach 26 maja za Cichanoŭskaha sabrali 1500 podpisaŭ. Ale podpisy, jakija ludzi pakidajuć na šmatlikich pikietach pa ŭsioj Biełarusi, kiraŭnika inicyjatyvaj hrupy Siarhieja Cichanoŭskaha nie cikaviać: raniej jon zajaŭlaŭ, što ŭdzielničać u vybarach, u jakich «ŭdzielničaje Łukašenka, a hałasy ličyć Jarmošyna», nie bačyć sensu.
Fiermier Juryj Hancavič centralizavana pačnie źbirać podpisy na pikietach 29-31 maja, jakija praviadzie ŭ pole. Na «kulturnaje śviata z konkursami i roznymi zabaŭkami» fiermier navat zaprasiŭ Alaksandra Łukašenku, paabiacaŭšy padrychtavać viertalotnuju placoŭku.
Muzyka Aleś Tabolič podpisy za siabie źbiraje anłajn. I navat nie prosić pakidać pašpartnyja źviestki — podpisy patrebnyja tolki kab pravieryć, kolki ludziej hatovyja padpisacca za jaho. Podpisy afłajn Tabolič taksama źbiraje, ale nazvać ličbu pakul nie hatovy.
