Claudio Bresciani/TT
Šviecyja z samaha pačatku pandemii pavinna była b pryniać bolš abmiežavalnych mier u baraćbie suprać novaha karanavirusa. Pra heta ŭ sieradu zajaviŭ dziaržaŭny epidemijołah Anders Tehniel u intervju «Šviedskamu radyjo», piša TASS.
«Kali my sutykniomsia z toj ža chvarobaj pry tym, što my viedajem pra jaje siońnia, ja dumaju, my apyniomsia na paŭdarohi pamiž tym, što zrabiła Šviecyja, i tym, što zrabiŭ astatni śviet, — adznačyŭ jon. — Ja dumaju, u tym, što my zrabili ŭ Šviecyi, jość patencyjał dla palapšeńnia, całkam jasna. I było b dobra viedać, što mienavita treba vyklučyć, kab lepš praduchilić raspaŭsiud infiekcyi».
Ale Tehniel pry hetym usio jašče nie ŭpeŭnieny, jakija mienavita miery pavinna była pryniać Šviecyja.
«Nasamreč, usie krainy adrazu ŭklučyli ŭsie miery. Šviecyja — adna ź niešmatlikich krain, jakaja abmiažoŭvała ŭsio bolš i pastupova. Usie astatnija krainy pačynali z mnostva rečaŭ adnačasova, i prablema ŭ tym, što niezrazumieła, jakaja z pryniatych mier dała najlepšy efiekt. Moža być, my daviedajemsia ciapier, kali abmiežavańni admianiajucca pa adnym, a zatym atrymajem niejki ŭrok ab tym, što jašče, akramia taho, što my zrabili, možna było b zrabić biez poŭnaha łakdaŭnu (režymu strohaj izalacyi)», — ličyć jon.
Urad Šviecyi paśla rašeńnia ES zakryŭ miežy dla zamiežnikaŭ, jakija nie pražyvajuć u Jeŭrasajuzie, žycharoŭ krainy zaklikali nie pravodzić schody kolkaściu bolš za 50 čałaviek. Ułady taksama rekamiendavali pieravieści navučańnie starejšych kłasaŭ, kursy dla darosłych i VNU na dystancyjnaje navučańnie. Dziciačyja sady, škoły dla pačatkovych i siarednich kłasaŭ pa-raniejšamu pracujuć. Karancin u krainie ci asobnych rehijonach uviedzieny nie byŭ, kramy i pradpryjemstvy hramadskaha charčavańnia zastajucca adkrytymi.
Kolkaść vypadkaŭ infikavańnia karanavirusam składaje ŭ Šviecyi 38 589 (385 na 100 tys. čałaviek). Kolkaść achviar — 4 468 čałaviek.
