Alaksandr Łukašenka pravioŭ siońnia sustreču ź ministram achovy zdaroŭja Uładzimiram Karanikam. Abmiarkoŭvalisia pytańni hatoŭnaści ajčynnaj sistemy achovy zdaroŭja da mahčymaj druhoj chvali pandemii z ulikam abranaha Biełaruśsiu šlachi baraćby z raspaŭsiudžvańniem karanavirusa, piša BIEŁTA.
Łukašenka adznačyŭ, što ciapier u śviecie šmat razmoŭ ab mahčymaści druhoj chvali pandemii. «Tak, pakul nie zusim heta jasna, zrazumieła i inšaje. Ale kali druhaja chvala, to naš šlach — heta absalutna toj šlach, jakim pavinny byli iści ŭsie dziaržavy», — upeŭnieny Alaksandr Łukašenka.
Uładzimir Karanik ŭ suviazi z hetym adznačyŭ, što ekśpierty, kali analizujuć, naprykład, šlach Šviecyi, u jakaści asnoŭnaj pieravahi nazyvajuć toje, što heta tyja mierapryjemstvy, jakija mohuć pravodzicca nieabmiežavana doŭha.
U razmovie z žurnalistami paśla zaviaršeńnia sustrečy ministr zhadaŭ vystupleńnie dyrektara Jeŭrapiejskaha rehijanalnaha biuro Suśvietnaj arhanizacyi achovy zdaroŭja Chansa Kluhie, jaki ličyć, što druhaja chvala niepaźbiežnaja. Pytańnie tolki ŭ tym, nakolki jana budzie ciažkaj i nakolki zakranie narmalnuju žyćciadziejnaść hramadstva.
«Choć niekatoryja ekśpierty pryvodziać prykład taho ž SARS (jaki vyklikaŭ atypovuju pnieŭmaniju ŭ 2003 hodzie), jaki vielmi blizki da COVID-19. Heta taksama siamiejstva karanavirusaŭ. Jon dastatkova doŭha dastaŭlaŭ šmat niepryjemnaściaŭ dla azijackich krain. U červieni dosyć niečakana dla ekśpiertaŭ zachvorvańnie stała źnižacca, a ŭ lipieni praktyčna źnikła i syšło ŭ epidemičny tupik. Nie było ni druhoj, ni treciaj chvali», — raspavioŭ Uładzimir Karanik.
«Tamu tut treba spadziavacca, što druhi chvali nie budzie, ale rychtavacca da jaje treba abaviazkova», — padkreśliŭ ministr.
