Siońnia adbyłosia zakrytaje pasiadžeńnie suda Centralnaha rajona Minska pa skarzie advakataŭ na zatrymańnie Viktara Babaryki. Sud skarhu nie zadavoliŭ, raspaviali TUT.BY abaroncy pretendenta ŭ prezidenty Dźmitryj Łajeŭski i Alaksandr Pylčanka.
Ciapier pastanova rajonnaha suda budzie abskardžana ŭ Minskim haradskim sudzie. Zhodna z zakonam pry razhladzie takoj skarhi sud moža pryznać zatrymańnie niezakonnym i ŭ tym vypadku, kali ŭ dačynieńni da zatrymanaha było dapuščana parušeńnie prava na abaronu.
— My, abaroncy, jak i sam Viktar Dźmitryjevič, adznačali hrubaje parušeńnie jaho prava na abaronu jašče ŭ dzień zatrymańnia — kali jon znachodziŭsia ŭ budynku DFR, patrabavaŭ advakataŭ, a advakataŭ nie puskali ŭ budynak, niahledziačy na adpraŭlenyja imi pa elektronnaj pošcie dakumienty ab paŭnamoctvach i skarhi, — skazaŭ Dźmitryj Łajeŭski.
Akramia taho, paśla sudovaha pasiadžeńnia advakaty raspačali novuju sprobu naviedać padabaronnaha ŭ SIZA — vynik toj ža: biuro propuskaŭ KDB nie prymaje dakumienty dla naviedvańnia sa spasyłkaj na epidemiju.
— U suviazi z hetym ja padaŭ u Hienieralnuju prakuraturu ŭžo treciuju na hetym tydni skarhu na pieraškody ŭ akazańni jurydyčnaj dapamohi, ciapier u skarzie abaronca kanstatavaŭ užo sistematyčnaje parušeńnie. Abarona spadziajecca, što Hienieralnaja prakuratura prymie miery da taho, kab pieraškody likvidavali. Pra reakcyju prakuratury na dźvie papiarednija skarhi pakul nie viadoma, — adznačyŭ Łajeŭski.
