Fota Nadziei Bužan
Palityk Mikałaj Statkievič zatrymany pa padazreńni ŭ ažyćciaŭleńni złačynstva pa č. 1 art. 342 Kryminalnaha kodeksu Biełarusi («Arhanizacyja ci ŭdzieł u hrupavych dziejańniach, jakija hruba parušajuć hramadski paradak»).
30 červienia Mikałaj Statkievič pavinien byŭ vyjści na volu paśla 30 sutak aryštu, adnak napiaredadni ŭviečary žoncy Statkieviča Marynie Adamovič patelefanavaŭ śledčy i paviedamiŭ pra kryminalnuju spravu. Pakul što Statkievič znachodzicca ŭ izalatary časovaha ŭtrymańnia na vuł. Akreścina.
U suviazi z hetym pravaabarončaja supolnaść Biełarusi pryznaje jaho palityčnym źniavolenym. Pry pryniaćci hetaha rašeńnia pravaabaroncy kiravalisia raniej pryniatymi zajavami biełaruskaj pravaabarončaj supolnaści ad 1, 9 i 11 červienia hoda ab pryznańni palitźniavolenymi fihurantaŭ «spravy Cichanoŭskaha».
Na padstavie hetaha biełaruskija pravaabaroncy patrabujuć ad biełaruskich uładaŭ nieadkładnaha vyzvaleńnia Mikałaja Statkieviča i spynieńnia raspačataha ŭ dačynieńni da jaho kryminalnaha pieraśledu.
Statkieviča zatrymali 31 traŭnia pa darozie na Kamaroŭski rynak u Minsku, dzie jon źbiraŭsia naviedać vybarčy pikiet Śviatłany Cichanoŭskaj. Paźniej Marynie Adamovič paviedamili, što Statkievič znachodzicca ŭ izalatary na Akreścina, jamu prysudzili 15 sutak. 15 červienia prajšoŭ jašče adzin sud, jaki dadaŭ palityku jašče 15 sutak. Na Akreścina palityk znachodzicca dahetul.
Kryminalnuju spravu pa hetym ža artykule (pa č. 1 art. 342 KK) zaviali na błohiera Siarhieja Cichanoŭskaha i jahonych paplečnikaŭ, Siarhieja Piatruchina, Alaksandra Kabanava, Uładzimira Cyhanoviča (MozgON), Ihara Łosika, Źmiciera Kazłova.
