Paśla razmovy Alaksandra Łukašenki z rabotnikami praŭładnych ŚMI analityk «Biełaj Rusi» Piatro Piatroŭski paśpiašaŭsia paviedamić u fejsbuku: u Biełarusi byli zatrymanyja čaćviora supracoŭnikaŭ HRU Rasii.
Hetuju infarmacyju jon paćvierdziŭ i «Kamsamolskaj praŭdzie». Praŭda, paśla Piatroŭski vydaliŭ svoj dopis, napisaŭ, što pažartavaŭ, a praz čas prybraŭ i hetyja słovy.
Čytajcie. Piatroŭski: Łukašenka raskazaŭ pra zatrymańnie ŭ Biełarusi čatyroch supracoŭnikaŭ HRU Rasii
HRU — rasijskaja vajskovaja vyviedka. Ciapier viedamstva aficyjna nazyvajecca Hałoŭnaje upraŭleńnie Hienieralnaha štaba Uzbrojenych sił Rasii, ale na pobytavym uzroŭni vykarystoŭvajecca staroje imia.
fota shutterstock.com
Pa infarmacyi «Našaj Nivy», historyja pra zatrymanych rabotnikaŭ HRU ŭspłyvaje nie ŭ pieršy raz. Padobnaje hučała i padčas vizitu Łukašenki ŭ Hrodna (16 červienia), i na sustrečy Natalli Kačanavaj z tvorčaj intelihiencyjaj krainy (1 lipienia).
Adzin z udzielnikaŭ sustrečy Natalli Kačanavaj z pradstaŭnikami intelihiencyi padzialiŭsia z «Našaj Niva» detalami. Tam prysutničaŭ i kiraŭnik Kamiteta dziaržaŭnaj biaśpieki Valeryj Vakulčyk.
Vakulčyk uziaŭ tam słova i raskazaŭ, što čatyry čałavieki ŭjechali ŭ Biełaruś z dapamohaj Michaiła Babiča, u čas, kali jon byŭ pasłom Rasii. Jany stali naviedvać pradpryjemstvy krainy, «pryhladacca». Na sustrečy navat nazyvali proźviščy tych supracoŭnikaŭ HRU, ich vysokija vajskovyja čyny i začytvali ŭryŭki z daniasieńniaŭ Babiča vyšejšamu kiraŭnictvu.
Treba adznačyć, što blizkija da siłavych kołaŭ telehram-kanały ŭžo trochu pisali na hetuju temu, praŭda, havorka była nie pra HRU, a pra FSB: adnamu z paplečnikaŭ Siarhieja Cichanoŭskaha prypisvałasia supracoŭnictva z rasijskaj słužbaj i metanakiravany pošuk dyskredytujučaj i piersanalnaj infarmacyi pra biełaruskich milicyjanieraŭ z nastupnym jaje apublikavańniem.
Varta taksama pryhadać ćmianuju historyju vysyłki ź Minska rasijskich dypłamataŭ z kampanii Babiča, u tym liku vajennaha ataše Ramana Śpirydonava, jaki byŭ dakazanym supracoŭnikam śpiecsłužbaŭ.
Čytajcie: Ź Biełarusi vyjechaŭ rasijski ataše pa pytańniach abarony. Padazravali ŭ špijanažy?
Krynicy «Našaj Nivy» tady paviedamlali, što Śpirydonaŭ byŭ vysłany za dziejnaść, jakuju nie nazavieš dypłamatyčnaj, ale i rasijskaje pasolstva, i biełaruski MZS davodzili, što ŭsio adbyvajecca ŭ miežach dziažurnaj ratacyi.
Praŭda, nieŭzabavie za Śpirydonavym Minsk pakinuli jašče niekalki rabotnikaŭ pasolstva, jakich pryciahnuŭ z saboj Babič.
Moža, havorka mienavita pra ich?
Čym možna patłumačyć uryŭkavaść i tumannaść źviestak pra imaviernych rasijskich śpiecsłužbistaŭ? Sprava ŭ tym, što śpiecsłužby krain SND pavinny ŭ svajoj dziejnaści kiravacca Ałma-Acinskaj dekłaracyjaj, zhodna ź jakoj udzielniki abaviazujucca nie vieści ŭ dačynieńnie adzin da adnaho niehałosnaj ahienturnaj i špijonskaj raboty.
Anałahičnyja pahadnieńni isnujuć pamiž śpiecsłužbami Biełarusi i Rasii.
I kali nasamreč byli zatrymanyja aficery słužbaŭ dziaržaŭnaj biaśpieki vajennaha i palityčnaha sajuźnika našaj krainy, vymaloŭvajucca abrysy dypłamatyčnaha skandała, da jakoha Minsk nie hatovy.
