Staršynia CVK Lidzija Jarmošyna padčas vystupu pierad aktyvam BRSM u Minsku prapanavała ŭ budučyni kandydatam na pasadu prezidenta stvarać finansavyja fondy dla ŭdziełu ŭ vybarach, pieradajuć «Minsk-Naviny».
Adkazvajučy na pytańnie pra nieabchodnaść źmianieńniaŭ vybarčaha zakanadaŭstva, Jarmošyna adznačyła, što hrašovyja ŭnioski paćvierdzili b «surjoznaść namieraŭ» kandydataŭ. Pavodle jaje, u krainie «dajšli da taho, što ŭdzielničać u vybarach mohuć biespracoŭnyja, ludzi biez adukacyi, jakija viaduć niezrazumieły ład žyćcia».
«Kali b centralnaja kamisija z zaŭziataściu nie praviarała zajavy ab rehistracyi inicyjatyŭnych hrup, ichnych udzielnikaŭ, to ŭdzielničać u vybarach mahli b 55 patencyjnych kandydataŭ, jakim patrebna była tolki placoŭka dla mitynhu. My vypuścili 15 pravieranych inicyjatyŭnych hrup. Ź ich padali dakumienty ab zbory podpisaŭ siem čałaviek. Atrymlivajecca, vosiem vykarystoŭvali heta dla samarekłamy», — raspaviała kiraŭnik Centrvybarkama.
Na dumku Jarmošynaj, hetak adbyvajecca, bo vybary ŭ Biełarusi biaspłatnyja.
«Miarkuju, nam daŭno treba pierachodzić da pryncypu, jaki vykarystoŭvajuć našy susiedzi — Ukraina ci Rasija. Naprykład, va Ukrainie, kab udzielničać u vybarach, treba ŭnosić vybarčy zakład — zdać u hryŭniach sumu, ekvivalentnuju 93 tysiačam dołaraŭ. Kali nie prachodziš u druhi tur, hrošy zaličvajucca ŭ biudžet. Ale ŭ nas kraina niebahatych ludziej. Nielha rabić vybary tolki dla aliharchaŭ. Tamu ja prapanuju: kandydat pavinien nie ŭnosić załoh, a stvaryć minimalny finansavy fond i pakłaści tudy hrošy. Heta paćviardžaje surjoznaść jahonych namieraŭ udzielničać u vybarčaj kampanii.
Hetyja srodki jon zmoža vykarystać dla apłaty dziejnaści inicyjatyŭnaj hrupy, druku rekłamnaj pradukcyi. U lubym vypadku heta dazvolić pravieści adbor i nie dapuścić da vybaraŭ dekłasavanyja elemienty», — skazała jana.
