Fota Nadziei Bužan
Pa stanie na 29 lipienia pravaabaroncam viadoma, što ŭ miežach kryminalnych spravaŭ za padziei 14 lipienia ŭ Minsku zatrymanyja minimum trynaccać čałaviek, paviedamlaje spring96.org.
Kryminalnyja spravy raspačatyja pa troch artykułach Kryminalnaha kodeksa: 363 (Supraciŭleńnie supracoŭniku orhanaŭ unutranych spraŭ), 364 (Hvałt u dačynieńni da supracoŭnika orhanaŭ unutranych spraŭ), 342 (Arhanizacyja i ŭdzieł u parušeńni hramadskaha paradku, spałučanych ź vidavočnym niepadparadkavańniem zakonnym patrabavańniam supracoŭnikaŭ orhanaŭ unutranych spraŭ).
27 lipienia ŭ miežach kryminalnaj spravy pa art. 364 (Hvałt u dačynieńni da supracoŭnika orhanaŭ unutranych spraŭ) i č. 1 art. 342 (Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich) zatrymany Illa Turkoŭ. Jon źmieščany ŭ izalatar časovaha ŭtrymańnia na Akreścina ŭ Minsku.
Taksama zatrymany Jaŭhien K. Pa papiaredniaj infarmacyi, jamu inkryminujuć, jak i Turkovu, dva artykuły Kryminalnaha kodeksa: art. 364 i č. 1 art. 342.
Ranicaj 29 lipienia za padziei 14 lipienia ŭ Minsku byŭ zatrymany Illa Freń. Jaho zabrali ŭ Śledčy kamitet na padstavie č. 1 art. 342 Kryminalnaha kodeksa.
Raniej z 10-sutačnaha aryštu nie vyjšaŭ Spartak Sirenka, jaki byŭ asudžany za «ŭdzieł u niesankcyjanavanym masavym mierapryjemstvie» i «niepadparadkavańni zakonnym patrabavańniam milicyi». Viadoma, što jaho pakinuli pad vartaj u jakaści padazravanaha pa art. 342 Kryminalnaha kodeksa — «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich».
Taksama paśla 12-sutačnaha aryštu ź CIP nie vyjšaŭ na volu Hleb Hatoŭka. 26 lipienia, u niadzielu, u jaho doma adbyŭsia pieratrus. Jon padazrajecca pa dvuch artykułach Kryminalnaha kodeksa: č. 1 art. 342 i 364.
Takim čynam, śpis fihurantaŭ kryminalnych spravaŭ za padziei 14 lipienia ŭ Minsku vyhladaje tak:
- Anton Šumaŭ (č. 1 art. 342 i 364 KK),
- Uładzisłaŭ Uścin (art. 364 KK),
- Uładzimir Chamičkoŭ (art. 342 KK),
- Anton Vałavik (č. 1 art. 342 i art. 364 KK),
- Spartak Sirenka (art. 342 KK),
- Illa Turkoŭ (art. 364 i č.1 art. 342 KK),
- Jaŭhien K-ski (papiarednie, art. 364 KK i č. 1 art. 342 KK),
- Illa Freń (č. 1 art. 342 KK),
- Hleb Hatoŭka (č. 1 art. 342 i 364 KK).
Pravaabaroncam «Viasny» viadoma, što pa dadzienych kryminalnych spravach zatrymanyja jašče minimum čatyry čałavieki.