U MZS Rasii zapatrabavali zabiaśpiečyć dostup konsulskich supracoŭnikaŭ da zatrymanych rasijanaŭ i spynić nahniatać «niepatrebnyja, asabliva ŭ pieryjad prezidenckich vybaraŭ, niehatyŭnyja emocyi». Pra heta paviedamlaje pres-słužba rasijskaha viedamstva.
— Adyjoznaja traktoŭka biełaruskim bokam zatrymańnia 33 hramadzian Rasii nie vytrymlivaje nijakaj krytyki. Na siońnia nam viadoma, što ŭkazanaja hrupa nakiroŭvałasia tranzitam praź Minsk u Stambuł, majučy na rukach usie nieabchodnyja dakumienty, uklučajučy avijabilety. Usiu łahistyku na terytoryi Biełarusi zabiaśpiečvała biełaruskaja kampanija. Pa nieviadomych pryčynach hrupa nie patrapiła na svoj rejs Minsk-Stambuł i vymušanaja była zatrymacca ŭ Biełarusi ŭ čakańni nabyćcia novych avijabiletaŭ biełaruskaj kampanijaj, — havorycca ŭ paviedamleńni MZS Rasii.
U rasijskim viedamstvie vykazali ździŭleńnie tamu, što biełaruskim bokam situacyja ŭjaŭlajecca sprobaj pradstavić toje, što zdaryłasia, jak źniešniaje ŭmiašańnie ŭ spravy Biełarusi.
— U rasparadžeńni biełaruskich uład, u tym liku avijacyjnych, jość usie nieabchodnyja dakumienty dla ŭstanaŭleńnia iściny, — padkreślili ŭ MZS RF.
MZS Rasii taksama zapatrabavała zabiaśpiečyć dostup konsulskich supracoŭnikaŭ da zatrymanych rasijanaŭ, spynić nahniatać «niepatrebnyja, asabliva ŭ pieryjad prezidenckich vybaraŭ, niehatyŭnyja emocyi».
— Raźličvajem na ŭzvažany abjektyŭny padychod biełaruskaha boku da ŭstalavańnia ŭsich abstavin taho, što zdaryłasia ŭ ciesnym uzajemadziejańni z rasijskim bokam, — padsumavali ŭ MZS Rasii.
