U aŭtorak, 4 žniŭnia, Śviatłana Cichanoŭskaja pry ŭdziele Maryi Kaleśnikavaj i Vieraniki Capkała naviedvajuć Słuck i Salihorsk. Mitynh u Słucku pavinien byŭ pačacca ŭ 17:30 (placoŭka kala Haradskoha maładziožnaha centra, vuł. Lenina, 158).
Vakoł płoščy z roznych bakoŭ sabralisia kala 500 čałaviek. Praz sahnanuju techniku mitynh tak i nie pačaŭsia. Nie adbyłosia biez zatrymańniaŭ.
___________________________________
18:30
18:24
18:08 Sotni ludziej pa-raniejšamu chodziać vakoł punkta zboru. Daišniki pierakryli ruch aŭtobusaŭ.
Ludzi razychodziacca nieachvotna. «Heta maja ziamla, i ja nikudy nie syjdu», — ledź nie płača piensijanierka.
17:58
17:51 Tym časam stała viadomaja, što kamanda Cichanoŭskaj zajaviła ab admienie mitynhu.
17:50 »Valera, što vy tam staicie. Davajcie siudy padciahniemsia ŭsie», — dužyja mužčyny stanoviacca za śpinami žančyn, jakija spračajucca ź siłavikami.
17:48 »Hańba! Vy ŭ Słucku žyviacie, nie ŭ Drazdach!» — saromiejuć AMAP piensijanierki.
17:44 Pačalisia zatrymańni. Zatrymali fatohrafa «NN» Nadzieju Bužan, adnak praź niekalki chvilin adpuścili.
17:30 Ludzi vielmi niehatyŭna reahujuć na pracu kamunalnych słužbaŭ, jakija pieraškadžajuć praviadzieńniu lehalnaha mitynhu.
Vyhladaje, što na placoŭku sahnali ŭsie kamunalnyja słužby. Na dachu moładzievaha centra imitujuć ramont, avaryjščyki korpajucca ŭ lukach, žančyny-kamunalnicy zavichajucca la kłumbaŭ.
«Davajcie vam dapamahu! Kali vy tak kvietki sadzili, jak pierad 9 žniŭnia», — padlataje da ich mužčyna.
«Usio, što jość u zielanhasie, usio źvieźli siudy, hańba», — śmiajucca z pazapłanavaha dobraŭparadkavańnia haradžanie.
Kupka mužčyn abmiarkoŭvaje vybary.
«Nu nie viedaju, za kaho hałasavać, niama hodnych», — kaža adzin.
«Aj Saša, ciabie pasłuchać, adzin Łukašenka tolki narmalny, — rezka abrubaje jaho Mikałaj, jaki pracuje ŭ ŽKH, i aburajecca: — Usio ŽKH užo daterminova prahałasavała. Tak i budziem, jak raby, pry hetaj uładzie. Jany chočuć, kab ich lubili. Dy jakaja luboŭ tut? My nie chočam vajny, chaj sydzie mirna!»
Kali avaryjnaja mašyna narešcie źjazdžaje, natoŭp pravadžaje jaje apładysmientami.
Ale radaść była niadoŭhaj.
«Dadzienaje mierapryjemstva niezakonnaje», — viaščaje ŭ miehafon milicyja.
Nahadajem, raniej u Słucku na placoŭcy, dzie 4 žniŭnia pavinien adbycca pikiet Śviatłany Cichanoŭskaj, padahnali techniku — aŭtavyški, palivalnuju mašynu i traktar.
Placoŭku, dzie pavinien prachodzić mitynh, aharadzili turnikietami.
Na padychodzie da placoŭki stajać traktar z kvietkami i palivalnaja mašyna. Pradstaŭniki «Zielanbuda» raspaviali, što źbirajucca sadžać tut kvietki na kłumbach.
Napiaredadni Słucki rajvykankam dasłaŭ na imia davieranaj asoby Cichanoŭskaj Mikałaja Masłoŭskaha paviedamleńnie ab tym, što pravieści mitynh na zajaŭlenaj placoŭcy nie atrymajecca «ŭ suviazi ź nieabchodnaściu praviadzieńnia terminovych budaŭničych rabot».
