Fota Nadziei Bužan
Praces prachodziŭ u sudzie Centralnaha rajona. Hałanava abvinavačvali ŭ niepadparadkavańni milicyi i drobnym chulihanstvie, piša «Radyjo Svaboda».
Na praŭładnym mierapryjemstvie dydžei ŭrubili «Pieramien!» Coja VIDEA
Kiryła Hałanava sudzili ŭ adzin čas z Uładzisłavam Sakałoŭskim, pracesy prachodzili adnačasova na roznych pavierchach budynku suda. Abvinavačanych na praces nie pryvozili, razhlad spravy adbyvaŭsia praz skajp.
«6 žniŭnia kala 19:00, znachodziačysia na vulicy Kachoŭskaj u prysutnaści vialikaj kolkaści ludziej, śviadoma sarvaŭ praviadzieńnie zaplanavanaha śviatočnaha kancertu, — havorycca ŭ pieršym pratakole, składzienym na Hałanava. — Uklučyŭ muzykalnuju kampazycyju, jakaja nie adpaviadała farmatu praviedzienaha mierapryjemstva. Na zaŭvahi nie reahavaŭ. Čym prajaviŭ jaŭnuju niepavahu da hramadztva».
Pavodle inšaha pratakołu, Kirył Hałanaŭ padčas zatrymańnia akazaŭ niepadparadkavańnie supracoŭnikam milicyi.
«Sprabavaŭ uciakać, — ahučyła pratakoł sudździa. — Chapaŭsia za formiennuju vopratku».
Kirył Hałanaŭ pahadziŭsia ź pieršym pratakołam, źmiest druhoha nazvaŭ chłuśnioj.
«Ja pracavaŭ na mierapryjemstvie la kinateatra «Kijeŭ», — raskazaŭ Kirył Hałanaŭ u sudzie. — Stavili huk. Tam było mierapryjemstva, arhanizavanaje dla taho, kab sarvać mitynh Śviatłany Cichanoŭskaj. Mnie było heta maksymalna niepryjemna. Ja paviedamiŭ pra heta kiraŭnictvu Pałacu moładzi. Pazvaniŭ dyrektarcy asabista i ad nas dvaich raskazaŭ, što nie chaču pracavać tam. Što mahu daciarpieć adzin dzień, ale potym chaču ŭziać adhuły za svoj košt. Albo ŭvohule zvolnicca. Dyrektarka paprasiła pačakać, nie haračycca. Mnie nie prablema pracavać, ja mahu pracavać sutkami. Mnie prablema takimi brudnymi rečami zajmacca».
Pa słovach Kiryła Hałanava, pieśniu hurta «Kino» jany z naparnikam spampavali ź internetu.
«Spampavali, čakali zručnaha momantu, kab jaje ŭklučyć, — raskazaŭ na sudzie Hałanaŭ. — Pa svaich asabistych pierakanańniach my byli pavinny znachodzicca siarod ludziej, jakija tudy pryjšli. A nie siarod arhanizataraŭ. Kali my ŭklučyli pieśniu, nichto ź ludziej nie prasiŭ jaje vyklučyć, nie było zaŭvahaŭ. Potym źjavilisia ludzi ŭ harniturach i nie paprasili vyklučyć muzyku, a pačali vyryvać šnury z aparatury… Ja pryznaju, što zajmaŭsia chulihanstvam. Ale chulihanstvam ja zajmaŭsia tym čynam, što ŭdzielničaŭ u arhanizacyi aficyjnaha mierapryjemstva».
Padčas dačy pakazańniaŭ Kirył Hałanaŭ jašče raz raskazaŭ, što nie supraciŭlaŭsia padčas zatrymańnia.
U 14.05 sud abviaściŭ rašeńnie pa spravie Kiryła Hałanava — 10 sutak.
Uładź Sakałoŭski taksama asudžany na 10 sutak.
